無頭緒，唔緊要，試下做一個小練習。
幻想下用一d東西代表以下既人物：
1. 畢菲特
2. 李嘉誠
3. Bill Gate
4. 曾蔭權
5. 邵逸夫
大家係咪幻想到答案呢？不過記住喎，你諗到既好有可能同佢地自己本人所諗既會有好大出入，甚至乎係佢地心目中會完全反對你所幻想的，所以都係唔好諗人地，都係諗自己好d啦。
我呢兩日間唔鐘都會諗下究竟有咩可以代表到自己，原先我都諗到有好多野架，不過諗多兩諗，又覺得都唔係咁似者，諗諗下又諗第二樣野，諗諗下又諗第三樣野，諗到最後發覺原來要用一樣野泥代表自己都唔係咁容易，似得a時又唔似b，頭都痛呀！
不過諗深一層，呢個現象反影左d咩呢？
筆者估計大概都係自己仲未有一個清晰既定位，仲未搵到自己終身既成就。
就好似上面果個小測試咁，一講個名出來，我就好容易咁聯想到一d東西，舉個例：
我諗到偶像畢菲特，就會諗起一大堆股票；諗到李喜誠就會諗起大把錢；諗起Bill Gate就會諗起電腦軟件；諗到曾蔭權就會諗起政府；諗到邵逸夫就會諗起電視台咁，總之一講起呢一大堆名，係筆者個腦入面就必然第一時間會浮起以上果d東西啦。
可是一諗到自己，雖然都會浮現一堆野，但就係無一樣野會係自己既核心，呢樣似d，果樣又似d，到最後，就發覺原來自己都唔知似咩，總之頭都痛啦！
回想起自己以前做過既工作，真係多到自己都唔係十分記得，比較有印象既包括：報紙派送員、快餐店廚師、酒樓廚師、西餐廳廚師、車房維修員、貨櫃拆卸員、物流公司送貨員、裝修公司打雜、清潔公司清潔員、保安公司保安員、保險公司推廣員、文儀用品公司電話銷售員、教育機構接待員、鐘錶銷售員、茶餐廳外賣員、糖水店侍應、酒店侍應，仲有，筆者快樂時代做過既半工作呀(係呢度唔講得、嘻嘻)，筆者估計以上的工作大概都寫得七七八八，漏左果d就真係唔係好記得，同埋排名當然係不分先後啦。
講完以前做過既工作，講下自己去過既地方，以不同的地方去數，包括中國、美國、新加坡、馬來西亞、泰國、韓國、台灣，呀仲有，自己最鐘意既香港，去過既地方，話多唔係多，話少亦唔算少啦，總算見識見識過，各地有各地既好，各地有各地既美。
至今回想起，擁有大學學位及多年工作經驗既自己，就真係唔知似咩，做咩都係三分鐘熱度，東做下，西又試下，總之好多野都好似試過，自以為好似識好多野咁，但就全部都係皮毛，只知表面，不知內裡，係就係吹得兩嘴，都係果句啦，講就天下無敵，做就梗係有心無力啦！
講左咁多，都係諗唔到有咩可以代表自己，有咩可以成為自己既標誌呀，唉！
最後，係呢度滴返一滴汗，扮下抺汗，等成篇文章無咁灰先，唔知係唔係呢滴汗，攪到老婆話我成隻麥兜咁，不過唔好聽到我似麥兜就以為我好肥咁樣喎，事實上，筆者係一個油浸都唔肥既人(呢句說話都唔知聽過n咁多次，仲要係由n咁多個人口中聽到，直頭聽到筆者自己都無晒反應)。
沒有留言:
發佈留言