靜

呢兩日個股市，真係都唔知有咩好講，靜到有d得人驚呀！

都唔知d人係唔係想暫時放低d股票，開開心心咁渡過2008年？定係因為港交所近排既決定，市場比佢一個回禮？呢d咁既市況，就真係靜得可憐，靜得恐怖，唔通風平浪靜係前奏，暴風雨來臨先真？而家都係要好似準備打風咁，做定防風措施，慎防打起風來，中蕉就無謂啦！呢d咁既市況，總知就用一個靜字來形容啦。

屋企冇人，又唔想出街，你地會做咩呢？其實有時，真係想靜靜地，一個人諗下野，發下白日夢，諗下東，又諗下西，諗兩諗，又諗返轉頭，咁樣諗下諗下，又一日，發下發下又一晚，都幾寫意。但係呢d咁既情況，一年三百六十五日，都唔知有冇一日係咁，等到屋企冇人，個電話又係咁響，熄左個電話，又話眼訓lu，總知要一個人靜靜地，諗下野都好難。

不過算啦，就好似空氣咁，你以為佢係免費咩？佢就話比你聽唔係免費，你試下落下水底，上下太空，你就知空氣係唔係免費架啦，所以話靜呢家野，都係要睇情況，唔怪之得，係呢個地球上面，居然有人從事呢個買賣寧靜既環境為生啦，抵佢發啦。

今日係年尾，恭祝你地新年快樂啦，身體健康，事事順意，唔少得既係股票升完再升呀。

捽數

捽數，呢個名我相信有好多人都未聽過，亦都相信有好多人聽過，而且仲好驚又好討厭呢兩隻字。係呢個金融業，好似保險、股票、基金、黃金、外匯咁，成日都會聽到呢兩隻字，而果d從事sale、marketing或者agent既，發生既頻率，仲要係超高呀。

咁點解會有呢兩隻字呢？其實好簡單，就係從事相關工作既人，每個月或者每日都要同公司報數，話自己簽左幾多張單，為公司搵左幾多錢生意，錢字當頭，有好多管理人員都會做出捽數呢個行為啦。

而我既試過被人捽，亦都試過捽人，被人捽數果種痛苦，又真係三言兩語都講唔完，又真係非筆墨所能形容，但相反，捽人數果種心情呢？千祈唔好以為好得意，捽人數一d都唔好玩，有時捽人數都係迫於無奈先會咁做，有幾多個真係虐待狂咁，鐘意去捽人數呀？

而我係年尾，通常都會特別緊張咁，就好似我呢個blog，計埋呢篇先同上年平紀錄，都係50篇，但係我有個習慣，亦都有個要求，就係每一年都要多過上年，希望每一日都多過昨日，所以呢幾日，我一口氣就打左成10篇blog，仲諗住超越上年，為我自己去做一個新既紀錄，提高自己既底線，除左個blog之外，為自己不斷咁去增值。

所以話，對一d人來講，捽數除左係一種壓力之外，亦都可以係一種推動力，可以令人不斷上升架。

口頭禪

唔知道大家有冇d咩口頭禪呢？我就有啦，我諗返自己既口頭禪，其實都幾多架，好似有“唔好理佢”、“就咁啦”、“由佢啦”、“求其啦”之如此類，就係呢d口頭禪，我就比人問左句，“你咩都唔理，咩都有佢，咁你理d咩呀？你負責d咩呀？”。

話時話，我自己都唔知有咩要我理，有咩係我負責，有好多時，我都只係睇，睇完講兩句，d事就會自自然然咁攪掂，咁我要理d咩，我負責d咩，又有咩關係呀？唔好夾硬問我呢個問題啦，玩咩？

到我真係出手果時，好多時都係你地攪唔掂，攪得唔好，咁就迫左我要出手，所以我都係覺得，我剩係睇，剩係講會好d囉，如果係要問我負責d咩，夾硬講，我應該係做包底果個，幫你地執手尾，幫你地度計囉。

我成日都覺得自己d手腳係好笨果隻，就好似打機咁，打果d拍子機，捽碟機，或者玩槍機，我都係打到九唔搭八，但係要我玩果d用腦game，我就當堂兩個人咁款，剩係咁睇呀，我梗係用腦好個用手啦，要我出手，同玩我有咩分別呀？

不過算啦，人始終都係要做，人始終都係要有d承擔既，係下年，我都係要認真咁諗下，我自己究竟理d咩，負責d咩啦。

利益申報

大家近排有冇睇一d財經新聞，或者一d股票分析報告呀？有冇留意到去到節目尾段，主持人會問一個問題呢？佢就係會問果個財經顧問，有冇持有我地頭先提過既股票呀？而家一d財經評論員，佢地所寫既股票買賣建議，好多都會係尾果度加上本人現時持有咩咩股票，或者冇持有相關股票，之如此類。

而呢個行為或者動作，專業d來講，係叫利益申報，點解要利益申報呢？其實係想保障某一方既利益，例如一間公司，佢地既董事，係上任之前，或者當佢地既私人利益同公司有衝突時，都要做呢個動作，如果果個董事冇做呢個動作，後果可能會好意想不到，舉一個例子，想當年，香港姓梁既前財政司司長，佢買左一架車，但係就冇利益申報，最後就攪到落台收場。

講返轉頭，果d財經顧問，佢地係就係有利益申報，但係唔係申報全部利益呢？主持人問佢地有冇持有之前所提及既股票，呢句說話我本人就覺得係值得思考啦。

首先，佢剩係問果個財經顧問本人有冇持有，而冇問佢至親，或者冇問同佢地有直接關連既人，例如冇問佢地既老公或者老婆，又冇問佢地既老闆或者客戶，總之就係問左呢個財經顧問佢本人。

第二，佢冇提及時間性呢個問題，大家都知，股票價格可以係每分每秒都會有升有跌，所以財經顧問所持有，或者冇持有相關股票既時間性都會好重要，等我試下作一個假設，假如該財經顧問佢已經持有一隻股票五年，而係呢五年裏面，該股票已上升左10倍，佢跟住同你講，根據過往既紀錄，呢隻股票係有好大既上升空間，佢建議你買入該股票，點不知果隻股票突然暴跌，得返只有佢當年買入之後既5倍利潤，但係你根據佢既建議買入之後，你就有所損失，佢就安然冇事。

但呢個係比較誇張既例子，現實中，財經顧問係唔會咁無良既，佢地係會有果句，講果句，因為你如果根據佢既建議去買賣，賺得越多，你自然就越相信佢，你成為佢客戶既機會率就越高，當然佢提高收入既機會率都越高啦。

財經顧問，佢地既建議係一個好重要既參考資料，值得留意，但投資始終都係個人利益既問題，係要小心處理，所以到最後都係建議一句，大家係投資之前，最好要了解你想投資既產品，當中所涉及既風險同回報，做好功課或者買賣前準備，先好投資，政府都有賣廣告啦，投資前應該諗一諗，唔識就上證監會網頁，或者問專業既投資顧問，要學阿“羊”咁，每件事都“咩”呀。

好公司

必勝客呢間薄餅店相信係香港應該冇人唔識，佢有今時今日既知名道，其實係有好多人係背後作出努力既成果，例如，果班股東係背後承擔左相當大既風險、公司管理層又諗左好多發展公司既大計，厨房部既員工又制作左好多好味既食物，各個服務員又付出左好多殷勤既服務，就係背後咁多人既努力先有今時今日出名既必勝客，所以話要經營一間公司，係要好多人一齊團結起來，每人緊守岡位，先至可以令一間公司發熱發亮。

而家金融海嘯直捲全球，香港都係其中一個受害者，咁究竟香港人可唔可以好似經營一間公司咁，團結一致，各人緊守岡位，去面對呢個問題呢？甚至將呢個問題轉化成機會，創造一個更美好既環境，讓各行行業百花盛放呢？

先講香港既股東，呢個毫無疑問就係香港每一個市民啦，我地絶對有權利去對香港所發生既事出聲，絶對有權利去對香港既情況發言，因為我地每一個人都承擔著香港成與敗既後果。

再講香港既管理層，呢個毫無疑問會係香港政府啦，佢地身份比較敏感，因為佢地一方面係香港既股東，另一方面又會係香港既管理人員，但係雖則係咁，佢地都應責無旁貸咁去將香港攪得有聲有色。

而香港既厨師，相信會係一班努力奮鬥既老闆啦，佢地會比任何一人都想香港政治穏定，經濟繁榮，所以佢地都係會樂意配合管理層所制定既規則，去從事商業活動。

而香港既服務員，呢個又點會唔係果班每日辛勤工作既打工仔呀，佢地熱愛香港每一處地方，每一個平台，所以佢地會對香港所發生既事，事事關心。

就係咁，一個香港，每一間公司，每一個市民，都為著可以令香港有更美好既明天而努力奮鬥。

講真呀，一間經營管理得好既公司，又真係可以比到佢既客戶一d意想不到既收獲架，就好似必勝客咁，佢除左可以比到你一餐美味既食物之外，又會比到你親切既服務，仲可以提供一個美好既環境比你同你的家人談天說地，更可以比你同伴侶留低美好既回憶，所以話經營一間好既公司，或者將香港發光發熱，呢d都會係香港人所希望見到既情況，都會係每個香港人既心聲來架。

環保

又睇到一段新聞，其實呢個話題係近呢幾年都好hit，相信日後都只會越來越hit，呢個話題就係環境保育啦，講真呢個話題所涉及既範圍，所涉及既層面，絶對唔會比政治經濟等少，絶對唔會比生理心理等簡單。

當中比較多人關心既，除左空氣、水、電、煤、石油、天然氣、農作物、或者花草樹木等，亦都會有歷史既保育、文化既保育。

天然資源，d人多數都係話節省使用，重環再用，或者使用替代能源咁，而歷史同文化保育，d人多數都係透過保護一d建築，或者係保護一d古物咁，將呢d所謂既集體回憶保留落黎。

講真，好多人都只係知保護呢d野有紀念價值，但又有幾多人知道點解我地要保護呢d野呀？有幾多人係為保護而保護？有幾多人係為左自己利益去保護呀？

好彩，係坊間而家越來越多自願團體，政府機構，或者有能力的公司向市民提供相關既信息，提供相關既服務，甚至使用相關既守則，如果唔係，地球先生只會越來越病，越來越唔舒服，所以得閒就可以上網睇下有咩環保新知識，環保新技術，為我地既地球先生做一d野，做地球先生既醫生架。

大事回顧

近排睇電視，好多節目都係講2008年大事回顧，咩咩最令人回味事件，咩最深入民心咁。

會唔會係中國奧運？四川地震？金融海嘯？陳冠希事件？飯島愛？倪震？

講真，上面我講既咁多件事，或者咁多個人，我都係頭先上網睇返先記得，如果唔係我都已經忘記晒啦，好似係我個腦度，冇呢d事發生過咁，空白一場。

我唔記得上面果d事，並唔代表我唔關心世界時事，並唔代表我冇人情味，亦唔代表我唔識分咩係是非黑白，如果係要去解釋點解我會係咁，比較接近既講法，我諗應該係我份人表較鐘意向前看，過去既事，對我來講只不過係一d數據，係一d有參考價值既資料，我相信過去的，就有得佢過去啦，如果係印象深刻既，咪將佢放係個腦裏面，得閒拿出來回味下囉，又真係唔洗話咁刻意去重提舊事o既。

好似中國咁，攪完一個咁成功既奧運會，而家又唔係去攪上海世博會，唔通佢仲會同你講，中國攪左個好成功既奧運咩。就好似四川地震，係就係有好多人受害，但唔通今日仲同你講，有幾多人受害，點解會地震咩，而家就梗係講點樣做災後重建啦。陳冠希、飯島愛、倪震事件，唔通而家仲話佢地既人生觀，佢地既私生活咩，講完就梗係算啦。

試諗下，如果個地球唔係順時針咁轉，係逆時針咁轉，你話幾咁恐佈呢？個個人都係行路打倒行，個時鐘唔係1點到2點，而係1點到12點，幾咁唔自然呀。

所以計我話，以前既野，得閒講下，得閒諗下，係一件唔錯既事，但就千祈唔好成日掛係嘴邊，話自己想當年點醒，想當年點勁，如果你係咁，我會同你講當年你係咁醒，當年你係咁勁，咁你就返去當年啦，唔好係度啦。

精明消費

有冇諗過每次經濟唔好既時候，都會有好多人或者機構教你點樣去做個精明既消費者，而佢地教你既方法不外乎四圍格價，用多d信用咭簽脹等，但究竟有幾多真係有用既呢？

先講四圍格價，呢個方法係要先知道各樣貨物本身既價格，仲要知道每樣產品既特性或者佢地既成份，呢d基本上唔係每個人都有能力去比較，首先唔係每個人都咁得閒去做呢d野，就算有時間，佢地都未必有能力去硏究唔同產品既相異性，而家都好d，有d大學或者自願團體，佢地會不時提供佢地既格價報告比消費者參考，而當中既俵俵者，就梗係消委會啦，所以大家係消費之前，不防去佢地既網站睇下，有d咩產品，有d咩舖頭係賣得貴過人既。

至於信用咭，呢個方法首先你要有信用咭先啦，仲要有個足夠你消費既信用額，如果唔係講咩都冇用，但有信用咭唔一定你可以係一個精明既消費者。我地先諗下發咭機構佢地點解會提供信用咭服務，就係想你唔記得找咭數，或者冇找咭數時向你徵收利息。所以係諗住用信用咭消費之前，你一定要肯定自己有能力同記得找咭數，如果唔係分分鐘得不償失。現時好多銀行都有一種服務，就係當你要找咭數時，佢會自動幫你去找，呢個服務大多數都係免費架，記住得閒去申請啦。

仲有使用信用咭消費，一般都會有相當比例既簽脹積分，又或者現金回贈，甚至乎即時消費節扣，或者免息分期等，所以睇下邊將信用咭有咩優惠，果d優惠係邊度可以用都好緊要架，千祈唔好忽略左呢d咁唔起眼，但好重要既資料，“積少成多，堆雪成球”既道理真係唔講得少架。

股票

係未講股票之前，先講下我老婆先，今日我老婆終於上完一個課程啦，佢既最後一堂作品就係上面果幅相度，畫左一個似曾相識既圖案，我原本仲以為面上有d碎石，但原來係一d閃粉既物體，不過都幾靚啦，總算係叫合格多少少，對佢來講算唔錯架啦，至起碼會係代表左一個課程既結束，亦代表左人生另一個階段既開始，而就係咁，我越來越覺得佢有做濶太既條件，不過係做濶太之前，佢一定要有個富豪老公先，哈哈。

股票，大家聽到呢兩隻字會諗起d咩呢？

會諗起金融海嘯？會諗起股價升跌？會諗起收股息？

我就會諗起興趣，我就會諗起終身事業，我就會諗起一盤生意啦。

其實股票係指一種票據，證明持有人擁有一間公司一定數量的擁有權。

好多人買股票係諗住可以獲得因股價上升或者公司有利潤時，可以為自己帶來收入，而又有幾多人會將股票當成自己的興趣，當成自己的終身事業，當成一盤生意咁去睇呢？

我就係其中一個，而點解我會將股票當成興趣，就係因為股票涉及有很多不能確定的因素，牽涉的範圍很廣，要估計或者要分析包羅萬有既數據或者事情，呢個咁千變萬化的環境，就係令我著迷的原因啦。

我自細就好鐘意睇一d偵探型或者推理型既漫畫書，例如柯南、金田一、伽俐略、或者Liar Game等，睇著故事主人翁將一個一個迷團解開，睇著一個一個真相被揭開，果種興奮，果種快樂，又真係筆墨所不能形容。

正正股票呢樣野就可以為我帶來呢種感覺，要將股價升跌既原因呢個迷團解開，你係要好仔細，好有耐性咁四圍找尋線索，然後憑著個人既知識，憑著個人既智慧，去一層一層咁推斷個事實真相，係推理呢個過程裏面，當然係會遇到阻礙，但遇到阻礙時，只要保持冷靜，再認真重組數據，到最後都應該可以解開迷團，就係解開迷團呢種優越感，又點能夠唔高興？又點能夠唔興奮呢？就係呢d感覺，我就將股票當成自己既興趣啦。

而我又點解會將股票當成終身事業呢？其實背後原因好簡單，正正就因為股票本身既特性，正如我前面所講，股票係用來證明持有人所擁有公司的擁有權，持有股票既人，即係果間公司既老闆。試問有咩好過辛辛苦苦朝九晚五咁去搵錢，就梗係做好闆好啦。有一個好天真既諗法，試諗下，你手持有獅子保護既大笨象銀行股票，你可以好理直氣壯咁大聲講，而家都唔知有幾多萬人幫我打緊工，呢種咁豪既思想，咁放既睇法，有咩理由唔將佢當係終身事業呀。

股票仲有一樣好處，就係只要你年滿十八歲就可以買架啦，即係意味著你，如果當股票係終身職業，佢係冇退休年齡限制既，舉個比較近期d既例子，陸叔邵逸夫，佢今年巳經一百零幾歲，仲可以同你講，我而家想將邵氏私有化，你話啦，當股票係終身職業，就唔怕老左冇人生寄託啦。

至於一盤生意呢個睇法就有d複雜啦，其中一個原因係因為我讀書既科目，我讀大學係主修企業管治，主要內容係講管理人根據咩法律，運用咩方法去管理一間公司，點樣可以係公司既運作過程中，既符合法律既要求，又可以為公司增值，從而為股東帶來最大回報，最好就可以承擔埋公司應有既社會責任啦。

正正持有股票就可以達到呢個效果啦，持有股票多數都帶有一種權利，就係投票權，股東有權對公司既管理人員提出自己既意見，然後係股東大會上經過投票而接納或者拒絶管理人所提出的各種決議案，更甚既係可以投票選舉出各管理人員既名單或者人選。

就係股票持有人有呢d咁既權利，所以股票持有人係應該當股票係一盤生意來看待既，唔應該將股票當成只係用來炒賣既工具，你要對果間公司，果班管理層有信心，先至好買果間公司所發行既股票。

係買股票既時候，係應該要保持自己既一d睇法，唔好因為發生左一d事，或者聽到一d說話而對自己既眼光有所質疑，我聽過一個故事，係講我其中一個欣賞既人，佢既一段小插曲，佢就係股神巴菲特(warran buffett)，佢有一次係教堂同比爾蓋茨(bill gate)學畫畫，佢話：「如果你讚我畫得好，我好高興，但如果你問我點解唔加多一d藍，或者少一d紅，就唔該立即拜拜，幅畫係我既。」佢同蓋茨係好朋友就係人都知，但點解股神巴菲特冇受到佢呢位好朋友，軟件之神蓋茨既影響，而大手投資科技股呢？正正就因為佢覺得，自己唔明白科技，冇好深入既認識，冇自己既個人睇法，所以就冇大手投資科資股啦。

綜合以上既個人睇法，股票既可以帶來滿足感，優越感，又可以帶來金錢上既收入，仲可以為人生加多一d色彩。股票可以填補人係心理上、生理上或者物質上的一d需要，所以我就當左股票係我既興趣，係我既終身職業，係我既一盤生意來看待啦。

為最愛作總結

2008年既年尾，又係時候做總結，又係時候為來年做計劃。

最愛的事，最愛的人，最愛的，最愛的，最愛的。

最愛的事，對我來講，不外乎股票、股票、同股票。

今年股票市場，係由上半年高位至下半年暫時的底位，約5成幾跌幅，而我係股票市場呢？哈哈！好彩我有我自己多年硏究既投資心得，雖然係心得，不過都可以係呢度分享一下。

首先買股票，你一定要用多餘錢去買，千祈唔好用開飯錢去買，本人建議，最好就預留6至12個月基本家庭開支，再用閒錢去投資，6個月定係12個月，係視乎你收入既穏定性而定，跟住你就去選擇投資對象，而選擇投資對象就比較難啦，不過我都有一d大方向既。

第一，係要選擇投資既地區，選擇有發展潛力既國家，例如果個國家有大量儲備，或者只有好少的負債，有能力去使用財政政策，或者貨幣政策，甚至政治政策，去推動當地經濟政治發展，就咁樣果個國家會比別人走得更快，走得更遠，所以第一時間，係要分析唔同國家的經濟政治大環境。

第二，揀完地區之後，就要睇下果個地區裡面各行各業的經營環境，因為地區裡面各行各業的發展情況都會唔同，例如佢地面對的經營困難唔同，得到支持的情況都唔同，行業特徵又會唔同，所以第二樣要做既野，就是分析各行各業的發展前景。

第三，揀完行業之後，就要睇下係各行各業中，邊d公司會比較佔優啦。雖然同類型既公司係各行業的經營環境大致都一樣，但係都會因各樣因素而影響公司發展，例如公司有冇穏健既資產負債表，有冇穏定既現金流，或者有冇一d實力強勁的管理人員等，呢d因素都會影響果間公司既發展能力，所以第三樣係要對各公司做基本既分析。

第四，揀完公司之後，就要睇下入市既時機啦。公司股價，除左會受佢經營能力影響之外，仲會受到市場投資氣氛所影響既，有時果間公司明明係值咁多錢，但係點解個股價會跌得咁厲害呢，就係因為市場既投資氣氛所影響啦，俗說有句話，“寧買當頭起，莫買掉頭跌”就係咁解啦，所以最後一樣就係要對該公司做技術性既分析。

最後對股票作一個總結，先要有多餘資金，跟住就係要分析地區，然後分析各行各業，再對唔同企業做基本分析，最後就係對該公司做技術分析，咁就可以入市啦。

仲有一樣野，就梗係要計下風險與回報啦。

風險係指該投資的價值潛在的下降幅度，而要降低風險，一般都會用分散投資，或者係平均成本法。分散投資係指唔好將所有資金購買一樣資產，應該去買唔同類型的資產或者使用唔同的投資工具，而平均成本法係指定時定候用定額既金錢去買入相同既投資產品作出長期持有。

回報係指該投資的價值潛在的上升幅度，而要提高回報，一般都要對投資產品做一定的分析，然後對後市有一定的了解，咁就可以提高回報率架啦。

最愛的人，對我來講，就梗係我自己本人啦，除左我之外，當然又唔會少得我老婆同仔啦，仲有點會少得我個成日掛住七既大佬呀。

自己今年都算做得唔錯，係事業同學業上都有唔錯既表現，值得奬自己一個叻，但對來年我會保持樂觀審慎既態度，維持中性既投資評級，建議持有，目標價係一億。

而我老婆，今年除左有收入穏定既工作，亦都在學業知識上加大左投資，來年我對佢會持樂觀憧憬既態度，正式宣佈確定買入既評級，建議買入，目標價係三千萬。

對於我大佬，今年除左七之外，好似冇咩做過，維持係負面觀察既評級，建議係沽售，目標價係一百萬。

市場環境

首先，你地要有心理準備，今日打既blog會係我開blog以來，最長既一篇，放最多link既一篇，所以係呢度建議你地先去煮個麵，返轉頭再睇過，但千祈唔好諗住分開睇，因為你會再唔記得之前睇過d咩，亦會引致你地再睇唔明講d咩。

美國未能與三大車廠達成協議，呢個消息，本人相信會有很多人感到失望。

係未解釋之前，先講下兩個思想先，第一個係社會主義，另一個係資本主義。

社會主義，比較典型既例子會係我地既祖國，即係中華人民共和國。而家係金融海嘯既情況底下，我地都會聽到好多新聞，例如，中國政府提出四萬億人民幣振興經濟的方案，中央銀行大幅減息108點，向東航及國航分別注資30億人民幣，大力增加60億人民幣購買農具補貼等等。

資本主義，比較典型既例子會係美國。佢係金融海嘯既源頭，我地近排都聽到好多關於美國既經濟新聞，例如華府向某某保險公司提供借貸，聯邦銀行購買某某銀行既優先股，美國政府提出7000億美元救市方案，美國某某企業更換管理層等等。

就係係咁唔同既文化背景之下，兩地央行都會作出唔同既考慮，亦有唔同既決定。

係中國提出四萬億方案之前，全中國人民都萬眾期待呢個政策出台，但反而係美國未提出7000億方案之前，情況就有唔同啦，有市民或者議員，佢地反而會諗，企業出事，係咪應該用公帑來救佢地。

就因為呢個問題，又要講多一樣野，就係國企同私企。

中國尚未開放改革之前，大多數經濟活動都是由政府策劃的，例如生產甚麼、生產幾多，或者是為誰生產等，大多是由政府設計及決定的，而呢樣野就係計劃經濟既特色，但美國的情況就唔同啦，佢地主張市場經濟，即係所有經濟活動都是由市場決定，例如商品種類，商品價格，或者係生產規模等；就係呢兩個咁極端既思想之下，就出現左中國國內多國企，而美國國內多私企既情況。

現今全球正爆發金融危機，令到美國政府迫於無奈地出手出資拯救出現問題的企業，美國政府透過購買企業的股票，提供緊急借貸，或者撤換企業管理層來加大對企業的規管力道，監管範圍，就係咁樣，令到美國國內多左好多國企，咁樣實在有遺美國本身信奉既市場經濟主義，相反，現今中國的情況亦不遑多讓，自從中國開放改革，加入世貿之後，中國國內亦都多左好多私企，中國透過將企業上市，鼓勵市民自組公司，令中國境內私企的數目大幅上升，咁樣亦都同佢本身使用計劃經濟主義既原則有所唔同。

就係係咁樣既情況，呢個世界就會梗加有混合經濟既思想，即係一方面有計劃經濟既特色，另一方面又有市場經濟既特色，好簡單既解釋，係一個經濟體系裡面同時存在國企和私企，而生產咩商品，生產幾多，係咩價格底下買賣，同賣比邊個呢類問題，係同時由政府和市場共同決定。

再講返中國開放改革既情況，中國透過改善法律制度，例如改善合同法，加強保護版權、商品標籤、專利權等知識產權，來吸引外國資金直接投資，呢個國外資金直接投資即係外國企業或者外國政府和外國人，他們將資金直接在中國開設生產線或者銷售公司，或者透過收購合併既方法來投資， 就係係咁樣既情況底下，中國的外匯儲備，自改革開放以來大幅度地增加。

講起外匯儲備，首先要講三個市場，第一個係外匯市場，第二個係貨幣市場，第三個係資本市場。外匯市場係比國家或者企業，甚致乎投資投機者進行買賣既環境，佢地會係外匯市場以相方定明既價格，定明既時間來買或賣定明數量既不同既貨幣，當中一個好重要既決定因素就係外匯交換比率，而影響呢個外匯交換比率既因素亦不外乎供應需求、通脹通縮、利率升降，亦都會因為市場心理狀態而改變架，就因為咁，各個國家都會為當地既外匯交換比率設立左一d外匯管理機制，就好似浮動匯率制、固定匯率制、聯繫匯率制。

講返中國同美國，中國所採用的外匯管理機制係採用有限制浮動匯率制，即係在限制範圍內讓匯率自由浮動，而美國就採用單獨浮動匯率制，即係指美金不與其它任何貨幣固定匯率，其匯率根據市場外匯供求關系來決定。好明顯，中國而家所採用的匯率制度仍然會受到中央政府的影響而有所改變，但係美國就唔同啦，佢仍然好專重呢個自由既市場機制，佢仍然覺得投資投機，或者對美金有使用需求者，會好明白呢個機制既運作。

講完外匯市場，跟著就講下貨幣市場，貨幣提供者的角色一般都會係中央銀行或者地區銀行等，佢地大多會提供存款、提款、貸款和融資服務，如果企業，市民甚致政府有財務上的需要，佢地可到該貨幣提供機構開設戶口便可得到相關服務，而國際貨幣基金會或者世界銀行係當中既俵俵者。

我地成日都會聽到一d有關貨幣既新聞，會係M1、M2同M3，M1指市民持有的法定貨幣(包括紙幣及硬幣)與銀行客戶的活期存款，M2指貨幣供應M1所包括的項目，再加上銀行客戶的儲蓄及定期存款，以及由銀行發行並由非銀行持有的可轉讓存款證，而M3係指貨幣供應M2所包括的項目，再加上有限制牌照銀行及接受存款公司的客戶存款，以及由這兩類機構發行並由非銀行持有的可轉讓存款證。

而家美國既情況係減息減到近乎零，佢係要採取量化寛鬆既貨幣政策來刺激經濟，即係意味著佢會開動佢國家果部印銀紙機，透過大量增加貨幣供應去刺激經濟，呢個方法無疑係可以令市場有大量貨幣供應，但同時係會令美金價值下跌，同會引致通貨膨漲既問題。中國既情況就有d唔同，中國亦都宣佈左希望2009年增加貨幣供應17%，但佢只係為左應付人民對人民幣既需求上升，而增加貨幣增應。

然之後我地再講下資本市場，資本市場一般都會劃分為股權資本或者債務資本，股權資本係指公司透過發行股票，向公眾或者有意投資該公司的人士收集資金，而債務資本係指公司透過發行債券，向債券持有人籌集資本，兩者最基本既分別係，股票持有人對公司有擁有權，有權分享公司既利潤，而債券持有人只係可以獲得合約訂明既利息，冇任何投票權既。

而家美國既情況係美國政府不斷買入公司股票，或者係買入公司債券，不斷向市場注入資金，令市場有大量政府既錢係度流動，咁樣係想改善美國既經濟環境，令市民繼續有工返，但中國就唔同啦，佢不斷咁將國家既公司上市，不斷咁抽走市場上的資金，目的係唔想經濟過熱，同埋想開放市場，令市場更加有彈性。

睇開d，開心d

又打blog啦，打下一日，打下又一日，咁又打到年尾，都係時候準備下年既野。

有時都真係幾悶，返工返學，返到都唔知天昏地暗，頭又痛，腳又震，都唔知為咩？

睇見d人自細就驕生慣養，遇到小小事就係度V嘩鬼叫，又話呢樣冇興趣，果樣做唔掂，食野又左揀右揀，呢樣唔好味，果樣冇營養，煩都煩死人，其實做人做事都好，凡事睇開d，唔好樣樣都咁執著，咁個人咪開心d囉。

其實我份人都好簡單，係我目標既事就堅持，同我目標冇直接關係既事，知道就ok，咁樣做人，表面上好似係咩都唔理咁，但實情係萬事盡在掌握中，你話幾咁好呢。

話時話，自己都唔記得就黎遊戲展，係12月19至22號，再寫多次，提下自己先。

一家人

有時一家人，真係會有本難諗經，唔同人會有唔同需求，唔同人又會有唔同的限度，如果要符合各人的需求，同時又要唔好超過唔同既限度，真係會有難度，但有難度還有難度，並唔係冇方法解決架，係可以藉住溝通，藉住適度讓步去解決架。

就好似我同我老婆咁，佢就咩都要理，咩都要你安排比佢，但係佢又要好清楚咁知道你點安排，會有咩結果，有咩好處，百幾萬個問題去問你，你話死未。

而我就為左唔同佢有衝突，為左大家都身處一個平衡點，我就採取左適度唔理既政策，呢個政策係咁既，為佢安排一d佢可以自己做既事，然後只係佢身後靜靜咁觀察佢做野既成效，只要佢做得冇問題，就唔好理佢，咁樣又可以满足佢咩都要理既需求，又可以令佢覺得我會為佢做野，同時又可以平衡到我唔係咁想理野既性格，一舉三得。

但係呢個大前題之下，係須要經過我同佢無限次既溝通，同作為老公某程度既讓步，先可以達到呢個目的，呢個效果。

有時讓步係可以避免好多麻煩，同製造好多歡樂架，所以適度讓步有時都幾好架。

互聯網

今日想講下一個非法行為，所以大家千祈唔好學，千祈唔好做。

呢個行為就係買賣人口，點解今日會講呢個問題呢，其實好簡單，就係今日比人串左一句，但諗深一層，佢講呢樣野都唔係無意思。

係未講買賣人口之前，先講一兩句果d巳發展國家，佢地成日都標榜小政府大市場，但事實係，好似而家美國咁，無啦啦又多左好多近乎國企的公司，無啦啦又有左好多公司，要求政府注資入股。

講返買賣人口，就我所知，早排有一隻mini game，佢個玩法同概念，就正正係買賣人口，而呢個game就係而家好出名既社交網站facebook上面有得玩，佢個名叫出賣朋友。

我係呢度講呢隻mini game，並唔係想賣廣告，又唔係鼓勵大家進行呢類活動，而係想講下今日比人串的心情，而我比人串既內容係咁，“好似你咁，真係放上網，都冇人bid你呀”，而講呢句說話既人，佢本身並冇惡意，佢只不過係想同我玩下，講下笑咁者。

但就係呢一句說話，令我諗到一d野，就係今時今日，互聯網真係令到呢個世界產生左好重大既變化，佢可以令你唔洗出街都可以買到一d你想買既野，又可以令你見到一d你諗都冇諗過會見到既人。

呢一句說話亦都令我諗到一個幾得意既情況，試諗下，自己究竟值幾多，人地又願意為你付出幾多，有幾多人願意為你付出，其實好簡單，但千祈唔好咁做，因為係犯法架，呢個做法就係將自己放上網，睇下有幾多人出幾多錢去買你。

上網bid野，有個好得意既習慣，就係會出一個底價，然後每人根據自己既意願同能力，出價去競投。

就係呢個情況，假設而家你將自己放上網比你bid，即係而家你係物主，你又會set幾多錢做底價，然後估下，有幾多個人bid你，佢地又願意出幾多錢去bid你。

到最後都係果句，呢個做法係犯法架，千祈唔好學，亦都千祈唔好做，但係諗完之後，你都可以同我討論下你個結果，睇下你自己會點睇自己，又或者可以聽下我點睇自己，點睇你。

歌詞

無奈又無奈，離別但未放開，分開、漂泊、再遇，遇上再分開，捉不緊，一切彷似命運，就是你的愛。

上面呢句歌詞，講真呀，我都覺得好玩野，但現實中，呢類情況又時常發生。

無奈又無奈，係一個失敗的人，經常會遇到的情況，若果想知道自己有幾咁失敗，你可以數下自己無奈的次數，若果係經常發生，我可以講一句，你成功極有限。

離別但未放開，會唔會係曾經心死，但諗深一層又唔捨得呢？

分開、漂泊、再遇，呢個連續動作，以前就真係唔係咁易，但而家就容易好多，以前你唔出街，機本上你係唔會撞到一d你唔想見，又話者一d你好想見但唔敢見既人，但係而家情況就唔同晒啦，就算你唔出街，呢類人都會因為你屎忽痕，出現係你面前...哈哈。

遇上再分開，呢句都唔洗點解釋，因為人始終都會...唉！

捉不緊，一切彷似命運，就是你的愛。

都係...算吧啦！

天天都是我的天，用英文來寫就係Every day is my day

過去，現在，未來

我讀大學，讀過三個科目，包括會計、管理、財務。

先講會計，首先就係公司先做交易，然後會計入數，再跟著做財務報告，最後就係用財務報告做分析，去決定而家要做d咩。

再講管理，就係管理人現在見到d咩情況，再決定而家要做d咩。

最後財務，就係預計未來會有咩事發生，去決定而家要做d咩。

就係咁，讀一個課程，佢會將你由過去、現在到未來四圍走，講真，我讀完之後，真係覺得自己仲勁過叮噹部時空穿梳機，鐘意回到過去，穿越未來，定係唔走留係現在，由我話事。

但實情係，當讀完呢三個科目之後，你要懂得分析過去現在和未來的數據，再要懂得從多角度思考，懂得咩時候做咩野，千祈唔好死牛一邊頸，太過執著。

有時執著係好，有時彈性係好，要靈活處理，咁樣咪冇咁易中蕉啦。

等級

今日見到一個情景，要係呢度分享下。

今日見到有一個人(a)向另外一個人(b)派卡片，b接到卡片後睇一睇，就同a講，如果要派卡片比b，就叫a上司或者上司既上司比佢，a跟著就同b講，唔好意思，我係受到上司的命令先前來找b，然後b就同a講，你返去叫你上司打比我秘書，有事同我秘書講，就係咁，a講bye bye走左去。

係呢件事入面，最終都係咩都冇做到，a同b都浪費左大家既時間。

a，係唔知人地情況底下，做左一大輪b認為唔講身份，唔講程序既動作。

b，係全不知情的情況下，做左一大輪無聊既行為。

其實，在我的立場，身份同地位係可以隨時間同情況而改變，並唔係每分每秒都咁著重架。

就好似上面個例子咁，講身份講地位，咁咪冇左做生意既機會，冇左做朋友既機會。

如果次次都講身份，講地位，我真係好有理由相信，呢個地球人類一早就死晒。

因為當人一出世，父母的地位必然會高於他們兒女的地位，咁如果連父母都講身份，講地位，他們的兒女便會連奶都冇得飲，係呢個情況下，人類點會唔絶種呀？

你地話，係唔係超低能，勁白痴？

成功的原因

一個男人要成功，不外乎要有幾樣野。

第一，佢先要有機會出世，要係一個男人先。

第二，佢一定要有一個好清晰既目標，清晰既時間表。

第三，佢一定要有一個樂於實行既心，努力向目標進發。

第四，佢一定要有足夠既天時同地利，配合佢既行動。

最後，佢一定要有一個女人係佢背後，幫佢打點一d細微細眼既野，做佢背後最大既推動力。

如果一個男人擁有晒同做晒上面既野都唔成功，咁佢只好講一句，下次一定唔可以再出錯，同諗一個更完美既計劃。

所以話要支配一個男人其實好簡單，只要支配佢其中一樣成功因素就可以啦。

就係o係呢個大前題之下，女人好多時都會選擇去做一d行為，務求去支配男人，例如佢地會想盡辦法去支配自己，令呢個男人要擁有一個背後女人既難度提升，令自己的價值同地位同時地提升，講真，呢個辦法唔係話唔好，但佢地好多時都唔明白，價值同地位，男人認定左就係認定左啦，支唔支配，提升唔提升，個結果都係一樣，份量十足，價值連成呀。

理想生活

每個人都有佢地心目中的理想生活模式，有d人會鐘意游游閒閒，有d人會鐘意忙個不停，有d人會鐘意健康食品，有d人會鐘意食得平快靚正。

就係呢d唔同既喜好，就構成左唔同既人，唔同既性格，唔同既行為。

鐘意游游閒閒既人，當佢地每日都要返工，佢地就會同你抱怨，無左私人時間。

鐘意忙個不停既人，佢地就會成日抱怨，懷材不遇，冇機會發揮咁。

鐘意健康食品既人，佢地就會同你抱怨，食得唔夠好，食物唔夠好味。

鐘意食得平快靚正既人，佢地就會抱怨食得太貴，食得太慢。

就係呢d咁唔同既人，組成左一個個國家，一個個社會，一個個家庭。

就係呢d唔同既意見，令到各個國家，社會，家庭不斷產生火花，不斷有新話題，不斷有新事情，所以我地應該堅持自己的睇法時候，同時亦應該體諒別人的訴求，但就千祈就咁好等人地訓到唔清唔楚時，做出抱怨既行為，因為咁樣好容易就會獲得一d自己唔鐘意既反應，令自己在抱怨的狀況中，更加失落。

最後要講多一句，支配唔支配，係要雙方配合，唔係話單一方自願就會有呢個結果，若其諗支配別人，不如諗下點樣去配合別人，因為當你有呢個做法既時候，別人都會好願意去配合你，最終制做一個雙嬴既局面。

呀！仲有一樣野，就係唔好以為唔出街，有d野就唔會發生，就唔會知，因為呢個世界有一種新科技係可以令你，足不出戶都能知天下事架。(真係有d似電車男)

去到呢篇仲有20篇，應該追到，唔知今年有冇人同我去遊戲展呢？係就記住12月19至22號呀，唔寫低，隨時自己都會唔記得去呀。

床上

你地會係自己將床度做咩呢？

其實係將床度真係有好多野攪架，可以打機，玩電腦，又可以睇電視，睇書，但係我做得最多既係訓覺，訓覺，同訓覺。

以前自己將床，上面會有床祳，有床單，有枕頭，有被，而家就少左d野，又多左好多野，就係少左將床祳，但係就多左好多本書，同化妝品。

先講少左將床祳，某人話好唔舒服，但我就覺得仲舒服過以前。

多左好多本書，某人就話好亂，但我就覺得好鬼死方便。

多左一大堆化妝品，某人話咁先似一間房，我就話呢間房變得貴過d裝修。

有時真係唔好睇少一將床，佢會係你同某人嘈交的地方，又會係同某人和好如初的藉口，亦會係回憶過去的好地方，由其是有兩兄弟都訓過，而且仲要係今非即比既時候。

消費劵

近日睇到新聞，話政府可考慮向市民派發消費劵，未講做法正確與否之前，先講下該建議的背景，原因好簡單，就係有大量打工仔失業，企業没有收入，有澳門向市民大派消費劵，和中央政府大力刺激的內需政策，政府擔心因市民冇能力消費而經濟衰退，所以會有政府向市民派發消費劵的建議，最後梗係想因為市民加大消費，從而推動經濟上升啦。

試諗下，一個家庭是經營生意的，現在一家之主向全家講，而家因為自家生意不景，我要動用家庭基金，向全家派錢，但條件是必須購買自家的產品。

呢個家庭大致分成兩類人，一類是有能力兼且要承擔家族生意，包括父母及長子長女，另一類是無能力兼且要其他成員承擔他們的開支，包括年長及年幼的家庭成員。

向全家成員派錢，有能力兼且要承擔家族生意的家庭成員，很自然會用呢d錢去增加自家生意的投資額，而無能力兼且要其他成員承擔他們的開支的家庭成員，很自然就會因手上多了錢，而加大購買自家生意的產品，最終都會是這個自家生意獲益。

其實使用家庭基金的確是一個唔錯的方法，但亦可在其中再作少許改動，令家庭基金更用得其所，更能發揮家庭基金的功用。

例如，向年長及年幼的無能力家庭成員，改成有付出，才有收獲的機制，令他們更加願意為了有更多的收入，向自家生意付出更多，一來可令平時閒置的勞動力引發出來，二來亦可增加他們再次投入或將會投入社會的能力。

向父母及長子長女，由派錢改成借款機制，令他們為了自家生意有能力還款，而向自家生意付出更多，一來可令自家生意有更多的營運基金，二來可改善自家生意的營運能力，三來亦可提高家庭基金的增值能力。

就因為以上既改動，既可以令成全家人增加收入，亦可令家庭基金有所增長，所以話增加家庭就業職位和改善借貸機制，遠比單單向家庭成員派錢來得好，做得好。

到最後一定要提醒一句，就係大開家庭基金，必然會令這個家庭基金的競爭能力下降，所以懇請這個一家之主，千析唔好單單地因自家生意不景，而隨便大開家庭基金向家人派錢，而應該選擇一些既可獲得家人歡心，又可增大家庭基金的方法，千萬不可好心做壞事。

大學生活

以前，大學畢業後，出來社會做事，好多人都會覺得你係天之驕子，必定會有出人頭地的一天，但時至今日，大學畢業生通街都係，情況就好似當漢宝包招牌跌落來，會有三件大學生中招咁。

以前，日日唔係唱k，就係去打機，根本自己諗都冇諗過會有讀大學的一天，但無奈地因工作需要，我都走左去讀大學。

記得返大學時，人人上堂都係度聽書，我上堂就係度諗，個股市今日會點，應該買邊隻股票，邊隻會升，邊隻會跌；當人人都返屋企做功課溫書，我就去左股票行，對住部股票機，好努力咁按股票號碼；當人人都上床訓覺，我就係度做股票分析報告；當人人都發緊春秋大夢，我先至埋頭做學校功課；我的大學生活就係呢個情況下渡過，雖然我既大學生活，會比人地悶好多，但係佢地係讀書時所做的事，好似唱k打機咁，我n年前已經覺得玩都玩到厭晒啦，我反而覺得我係股票行，我既生活比佢地充實n倍。

係大學生活中，有一d朋友會坐得特別埋，傾得特別多計，雖然佢地係唔同既人，但係佢地都有一個共通點，就係全部都係比較自閉，全部都好似冇左部電腦就會世界末日咁款，因為佢地習慣用email溝通，又經常係唔同既討論區中游盪，冇左部電腦，同啞既係冇咩分別，一開口唔係講功課，就只會係問你溫左書未呀，係咁樣既情況，個人唔傻就奇啦，而家青少年自殺率咁高，我真係有懷疑過會唔會同部電腦有關呀？

到最後，我都覺得讀大學係一個好開心的人生階段，至起碼可以拿到見工求職既入場劵呀。

內需和消費

成晚眼光光，訓唔著，所以開著部電腦睇下網頁，睇睇下又睇返自己以前寫過既文章，睇到係2007年6月22日題目叫結婚的blog，睇到一個差d就遺忘左的理論，真係好適合而家用，呢個理論係乘數效應，而乘數效應係點運作，係呢度我唔再多講，想知道就自己去睇返我當日寫果篇文章啦，我而家想講既係內需和消費，可推動本土經濟，從而促進全球經濟。

先講一個經典例子美國，再講中國的發展勢頭，最後講下香港現時的情況。

在美國，他們的經濟可以長期都係一個咁強的環境，除左佢地擁有高科技，高技術之外，亦都因為佢地的國民有高的消費能力和高的消費意願，好多人都知，美國人幾乎没有儲蓄習慣，但他們一般都有相當高的賺錢能力，試想想，一個有賺錢能力的人，冇咩儲蓄習慣，咁佢d錢會去左邊，答案好簡單，一係就去左投資，一係就去左消費，就係o係呢個咁樣既文化背景之下，造就左今時今日美國的強大，亦都造就左今時今日的金融海嘯。

再講下，我地祖國，亦即是中國，中央最新的經濟政策大環境係咩呀？就係推動農業發展，刺激內需，保持經濟平穏較快發展的勢頭。在最近三十年，中國開放改革的發展，令中國儲存到大量的財政儲備，發展左大量的生產技術，改善左法律及政治體制，提升左國際社會的地位，就係o係呢個社會背景下，造就左今時今日中國的強大，亦都造就左今時今日的良好勢頭。

然後講下香港，近日經常聽到一d公司倒閉、企業裁員，以及工人失業的新聞，情況實在令人擔心，令人憂慮，不過睇過美國的情況，祖國的發展，大家都會肯定內需，以及消費都可以推動經濟，發展社會的能力，所以係呢度要再次提醒各位香港市民，我地唔係無能力，唔係無儲蓄，唔係無經驗，只要我地同心合力，相信一定可以處理現時的經濟問題，再次創造社會的和諧氣氛。

有效地運用資源

今日睇到一宗新聞，內容係講直致現時為止，今年香港的外匯儲備蝕了數百億港元，這宗新聞真的令人心寒，原因係外滙儲備既反影了香港現時的經濟環境，亦反影了那些管理外匯儲備的人，他們管理資產的能力。

現時香港的經濟環境都不用我多說，大家可以上網、睇電視、或者翻閱各大小報章，甚至可在親朋口中都能略知一二。

我想說的是管理人的能力，繼早前金管局疑似審批程序有灟洞後，現時又將香港資產大縮水。

大家必須留意，香港之所以有今時今日的繁榮景象，有現時那麼雄厚的財政儲備，絶不是上天掉下來的禮物，更不只是靠那些高薪厚職的高官而得來的，而是因為累積了每一位香港人的努力才能擁有的。

咁究竟點樣先可以能有效咁運用現時香港的資源呢？

雖然呢個係一個絶對深奧的問題，但亦都不會没有辦法去解決的。

首先，我地可以檢討一下那些管理人的能力，同一時間，亦可檢討現時的管理方法，與此同時，更可分析現時全球的投資機會及風險，本人相信做了以上的事情後，定可增強香港資產的升值能力，更有效地運用香港的資源。

相信全香港的市民，都絶對不希望看見香港的資產價值每況越下，亦不希望每月動用數以十萬元，來出糧比那些會令香港資產貶值的管理人，更不希望當資產貶值後，只聽到因為環球經濟不景，迫於無奈地，香港的資產亦要跟隨貶值的藉口。

作為一個熱愛香港的市民，真的希望聽到香港人生活愉快的新聞，真的希望聽到外國人讚賞香港的政治系統的聲音，真的希望聽到非香港居民讚嘆香港經濟環境的呼聲。

在此希望各香港人，大家齊心合力，用一些合情、合理、合法、公平、公正、公開的方法，令香港的經濟、政治、法制及生活環境再次得到提升，亦希望香港各個管理人借鏡中央的十六字真言，做到「出手要快、出拳要重、措施要準、工作要實」的效果。

所以最後都係果句，We hope Hong Kong growth and growth, don't want Hong Kong down and down。

人生對對碰

今日睇左一本圖畫多過字的書，佢裏面有一個專欄，叫人生對對碰，今集既題目係知己。

作者將朋友分成三類，包括普通朋友、死黨和知己。

先講普通朋友，作者說呢類人的特徴係，當你們見面時只會say hi然後say bye果類，呢類普通朋友，會係佔左你人生的大部份比例。

再講死黨，作者說他最喜歡呢一類人，他的解釋是呢一類交往比較表面d，只係一齊玩，一齊做野，一齊企係同一陣線。

最後就係知己，作者說，知己係雙向的，必須以坦誠既心去對待，即係話你同佢之間係冇秘密既，作者仲講左一個睇法，內容係：「我咩都畀佢知道，試諗下，身邊真係有個咁既人，有咩好？我郁下條尾，佢都知我想點，我講左頭幾句，佢幫我接埋下幾句，都好乞人憎啫！」。

好啦，講到呢度，我想問一個問題，你地數唔數到自己有幾多個朋友？有幾多個死黨？有幾多個知己呀？係唔係數唔到呢？定係越數越多呀？

我初頭都數唔到，跟住數數下，又越數越多，然之後，扣下一個，扣下又一個，到最後，數來數去，又只係得果幾個，睇黎，我都係時候，檢討下自己的人際關係啦。

娛樂經濟共同睇

呢排得閒d，所以打多左blog，話時話直至今日為止，今年都係打左23篇，而上年就打左50篇，計落，隔日打一篇都唔會同舊年一樣，3日打2篇就差唔多啦。

今日打咩好呢？諗兩諗，又真係唔知打咩好喎。打經濟，又好似得金融海嘯，失業咁；打政治又好似冇咩好打咁，唔通打“前總統涉案，與庶民同待”咩？你唔悶，我都悶啦。

就係咁，諗下，睇下網頁，呢個畫面又開左幾粒鐘(由開始打到呢度，真係要成幾粒鐘架)。

好！今日就講下偶像啦，你地細個果陣時，有冇邊個係自己特別鐘意架，我就鐘意郭富城啦，我身邊既人，有人鐘意劉德華，有人鐘意陳慧琳，有人鐘意張學友，但就係冇人話過鐘意黎明喎。

鐘意郭富城，大多數都係因為佢識得跳舞；鐘意劉德華，大多都因為佢夠勤力，夠型仔；鐘意陳慧琳，大多係因為佢夠靚女；鐘意張學友，大多都係鐘意佢唱功好；但鐘意黎明既，我就唔知因為咩啦，因為我身邊冇人表示過話鐘意黎明d咩喎！

話時話，你地鐘意偶像係為左咩呀？講真，而家諗返轉頭，自己都唔知為咩，既唔係為左見多佢幾面，又唔通係想食佢煮既麵，又真係唔知為咩？

成日都聽到，佢地話娛樂圏愈來愈難做，唔通係因為出生率低左？好多人買翻版？定係多左人鐘意download？抑話而家多左狗仔隊，寫左一d剩係佢地先知堅定流既娛樂新聞呀？真係公說公有理，婆說婆有理，一言難盡呀。

都係果句，I love Hong Kong growth and growth, don't want Hong Kong down and down。

重新整理

一個人真的有很多東西須要整理，既要處理家中的大小事務，又要整理學校中大量的功課，更要整理來自公司的大堆文件，到最後本人還是先整理財政狀況。

不整又事可，一整把幾火，先睇睇那份強積金報告，由2000年供款到現在，那結果還似是尚未供過一樣，若真的是自己的投資決定，出左事都心甘命抵，而家連邊個做投資決定都唔知，剩係知邊間公司，輸錢都唔知搵邊個，想嘈都唔知嘈邊個，真係天冇眼。

再睇下d保險，果d紅利仲少過銀行派果d息，唔係睇在個保額份上，真係想cut左佢。

到最後，惟有都係自己比心機，做下功課，從整一下自己最有把握的投資組合，靠自己的投資眼光，係呢個證券市場，搵番一d好過強積金，好過保險的投資回報。

而係我搵回報的同時，我老婆不斷咁提我，要搵回報，亦要小心風險，就係咁，我就左計右計，左睇右睇，咁又計左一大日，睇左一大日。

最後都係果句啦，要有高回報，就要承擔高風險，唔願承擔高風險，咁你咪低回報囉，投資梗係涉及風險啦，要知有幾多風險，最好就係先自己了解清楚，唔明白就去問，唔好盲中中，出左事就去示威請願，攪到冇左個和諧氣氛。

仲要我老婆睇完，比佢講左一大堆癈話，又話潮唔係唔比你潮，潮你都寫清楚d呀，寫完都睇唔明你講咩，攪到我又改左幾句(意思一樣，我就係我)，唔會向惡勢力低頭，吹呀...哈哈。

冇題目

唔知大家有冇睇過一套美國電影或者連續劇，佢個名叫sex and the city，我呢排就同我老婆追緊呢套劇，呢套劇係講一個女家作、律師、公關和藝術家的生活故事，在她們的日常話題中，大多都是圍繞性、異性關係和同性關係，而每一集都會有一個題目，每一習呢個女作家都會在電腦上打出一個報章專欄的所圍繞的問題，故事既寫實，又風趣，本人相信這些故事，真實地反影了當時一部份紐約人的心態和情況，就係呢套劇集，我老婆第一次用英文同我溝通，雖然今時今日，她的英文水平還算是不合格的一類，但我身為她的老公，我當然感到高興，因她由害怕英文，轉成勇敢面對英文，今天還大膽地挑戰我的英文，就係係咁樣的情況下，我決定要同佢一齊睇多d英文劇，來提升我們兩人的英文水平(雖然我的英文已經是大學水平)，為我們兩人增加多千萬個話題。

仲有我老婆己經重回校園，她每星期都要返學，我相信佢一定係深深地受到佢老公的影響(因為我都係返緊學)，但係佢所讀的科目，就係佢自己揀的，呢個科目既可以發揮女人的本性(貪靚)，又可以發揮女人的天性(洗錢)，呢個科目就係“化妝與個人護理”。

不知所為

無聊的一天，只能說無奈的一句，既生亮，何生喻。

有了一個天資聰敏的頭腦，為何還要有一段黑仔的命運。

聰明人，遇上崎嶇的路途，他會尋找一條較平坦的道路。

愚蠢人，遇上平坦的路途，他會待在路上，迷失方向。

聰明人總有遇上愚蠢人的一天，崎嶇路總會有平坦的一段。

就係咁，聰明人、愚蠢人、崎嶇路、平坦路，都打左一大段文字，

一大篇文章，一大堆癈話。

分散風險

今日睇到一本招聘雜誌，在其中的一個版面中，作者提到當女人在失戀時會有辭職的念頭，而他對這一想法的評價是，當一個人在情場失意時，應更加努力地工作，因這才可失一得一，不致失一變成失二，而就係呢個想法，令我回想到一個我在讀大學時學到的一個方法，風險分散。

風險分散理論是這樣的，你現時手持十元，假若你用呢十元全部都購買同一隻股票，當呢隻股票的價格上升或下跌時，你便會因手上的十元全都購買一隻股票，而享享到十足的利潤或背負十足的風險，但假若你將呢十元分開購買十隻股票，便有可能當一隻股票的價格下跌而另外九隻上升時，仍有獲利的機會，這樣就避免了將全部資產集中的風險。

再回來細心想一想，風險分散理論，是否真的可以將風險分散？

先講第一個問題，但係未講之前，大家諗一諗買股票的成本，簡單d講，你購買股票的成本是由股票價格及購買數量所組成，舉個例子，今天碧桂園(2007)的收市價是1.22元，而它的交易單位是一千股一手，你購買一手碧桂園的成本價是$1.22乘1000，那便是1220元，還未計算其他交易成本，再舉一個例子，今天雅居樂(3383)的收市價是2.74元，而它的交易單位是二千股一手，你購買一手雅居樂的成本價是$2.74乘2000，那便是5480元，那當然未計交易費用啦，而在香港，除非你購買的是月供股票計畫，或股票基金，否則你便需要以一手作買賣的單位。

我們將呢個風險分散的理論應用在這兩個例子中，讓我們了解一下這個理論的運作，假設你現時持有一手碧桂園及一手雅居樂，根據風險分散理論，你持有多於一個資產，風險便會自動下降。

第一個情況，碧桂園上升0.01元而雅居樂下跌0.01元，你的身家將會有何改變？碧桂園上升0.01元，你的身家便上升了0.01元乘1000等於上升了10元，但同一時間，雅居樂下跌0.01，你的身家便下降了0.01元乘2000等於下跌了20元，呢個情況中，你的總身家便下跌了20元減10元等於10元。

第二個情況，碧桂園上升0.02元而雅居樂下跌0.01元，你的身家將會有何改變？碧桂園上升0.02元，你的身家便上升了0.02元乘1000等於上升了20元，但同一時間，雅居樂下跌0.01，你的身家便下降了0.01元乘2000等於下跌了20元，呢個情況中，你的總身家便不變地20元減20元等於0元。

第三個情況，碧桂園上升0.01元而雅居樂下跌0.02元，你的身家將會有何改變？碧桂園上升0.01元，你的身家便上升了0.01元乘1000等於上升了10元，但同一時間，雅居樂下跌0.02，你的身家便下降了0.02元乘2000等於下跌了40元，呢個情況中，你的總身家便下跌了40元減10元等於30元。

第四個情況，碧桂園下跌了0.01元而雅居樂上升了0.01元，你的身家將會有何改變？碧桂園下跌0.01元，你的身家便下跌了0.01元乘1000等於下跌了10元，但同一時間，雅居樂升0.01元，你的身家便上升了0.01元乘2000等於上升了20元，呢個情況中，你的總身家便上升了20元減10元等於10元。

第五個情況，碧桂園下跌了0.02元而雅居樂上升了0.01元，你的身家將會有何改變？碧桂園下跌0.02元，你的身家便下跌了0.02元乘1000等於下跌了20元，但同一時間，雅居樂升0.01元，你的身家便上升了0.01元乘2000等於上升了20元，呢個情況中，你的總身家便不變地20元減20元等於0元。

第六個情況，碧桂園下跌了0.01元而雅居樂上升了0.02元，你的身家將會有何改變？碧桂園下跌0.01元，你的身家便下跌了0.01元乘1000等於下跌了10元，但同一時間，雅居樂升0.02元，你的身家便上升了0.02元乘2000等於上升了40元，呢個情況中，你的總身家便下跌了40元減10元等於30元。

第七個情況，碧桂園不變而雅居樂上升了0.01元，你的身家將會有何改變？碧桂園不變，但同一時間，雅居樂升0.01元，你的身家便上升了0.01元乘2000等於上升了20元，呢個情況中，你的總身家便上升了20元。

第八個情況，碧桂園上升了0.01元而雅居樂不變，你的身家將會有何改變？碧桂園上升了0.01元，你的身家便上升了0.01元乘1000等於上升了10元，但同一時間，雅居樂不變，呢個情況中，你的身家最終便上升了10元。

第九個情況，碧桂園不變而雅居樂上升了0.02元，你的身家將會有何改變？碧桂園不變，但同一時間，雅居樂升0.02元，你的身家便上升了0.02元乘2000等於上升了40元，呢個情況中，你的總身家便上升了40元。

習慣

今日回想，自己究竟有幾多野真係很喜歡的，一諗再諗，發現原來自己很多喜歡的事，居然都係一d社會上大多數人都會認為係唔好的事。
我鐘意訓覺，但社會上覺得鐘意訓覺既人係一個懶人，只會纔食社會的資源，係社會的圾垃。
我鐘意食煙，但社會上覺得食煙既人係煙鏟，只會破壞社會的環境，係社會的破壞者。
我鐘意溝女，但社會上覺得只僱溝女既人係人渣，只會終日遊手好閒，係社會的寄生蟲。
我鐘意"句句都係堅的"，但社會上覺得講呢句野既人，其實"句句都係流既"，係社會的大騙子。
最後我係訓完覺、食完煙的情況下，我發現雖然我喜歡的事都不係社會所接受的，但係我仍然會堅持自己的立場，因為我就係我，我就係危機之子。
如果真係要我改變自己的習慣，除非發現自己都唔可以容忍時，咁我就會割愛啦。
講完自己有一大堆社會唔認同的習慣，成個人都好似輕鬆左好多咁款，都係果句啦"意見接受，態度就梗係舊啦"，因為我真係"句句都係堅架"。

萬聖節

今日剛好是萬聖節奕日，大家又會如何渡過呢個萬聖節呢？

會係去海洋公園哈佬喂？會係去廸士尼黑色之夜？會係去籣桂芳飲酒狂歡？

我就同我老婆去左青衣城享受左一頓美味的牛扒晚餐。

係呢間餐廳裡面，我同我老婆就傾左好多個話題，當中包括餐廳的裝修、餐廳的美食、我們兩人的生活情況、兩人的感情關係，當然梗係唔會少左講香港的經濟環境，同埋我一定會每天同佢講的是證券股票的話題啦。

餐廳的裝修。我地都發覺，它己經有一段很長的時間冇大更改，正確一點應該話係從開業至今都未有作出重大更改，都係以水底世界為其主題，但有一不同的是，他再不在餐廳外增設坐位，這使其客人不能享受美麗的海景，更加不能抽煙啦。

餐廳的美食。我地都發現，它們的價格都在不斷上升，但食物的質素卻不斷的下降。

我們兩人的生活情況。我們都發現，我們的生活都由以前五光十色，轉變成今天的平靜，每天都是返工放工，返學放學。

兩人的感情關係。我們都發現，我們已經擁有了愛的三大原素，親密、激情和承諾。

親密（intimacy）：愛的情感元素。親密感即是一種投契、心靈相結合的默契，感覺與所愛的人非常親近，彼此接納，凡事可以與對方分享溝通，並從對方身上得到支持與鼓勵。親密感的表達方式是：藉由內在的感覺來溝通，分享個所擁有的，包括時間和自我，並提供情感上的支持。

激情（passion）：愛的動機元素。激情喚起人們心理上的注意力，更熱切的勾起和所愛的人聯結之意，激情的進展是很快的，不是循序漸進的。激情所表現在行為上的是：希望和所愛的人相處在一起。相處時快樂溫馨，分離時強烈的思念，覺得對方極有吸引力…等，有時並藉親吻、擁抱、撫摸、做愛等傳達激情。

承諾 (commitment) : 愛的認知元素。人們幾乎是在瞬間決定愛某個人，確定關係之後再許以長時期的允諾。許諾是維持關係長久的動力，某些配偶在親密感、激情消失紿盡時，它是唯一僅存的。許諾則利用忠誠、關係的建立、患難與共，或是藉訂婚、結婚等付諸實現。

香港的經濟環境。近日，在金融海嘯下，香港的經濟，真係一天比一天令人擔憂，市民的不滿一天比一天地增加，難捱了。

證券股票的話題。直至今天，恒生指數由高位三萬幾點，下跌至昨日的近萬四點，足足跌左五成有多，賺的賺了，蝕的蝕了，但有很多還在坐艇的，繼續坐艇。

我們倆人享受過美味的晚餐，橫行過漂亮的海旁後，便帶著既滿足又快樂的心情回家去了。

雷曼苦主

好耐都冇寫過關於香港經濟的事了，至於點解係今日去寫，因為早幾日，有人同我講，話我點佢開blog打字，後尾又冇咗件事咁款，所以係補鍋的情況下就有左呢篇野。

雷曼事件發生至今，應該大約有一個月了，而本人在電視、報章、雜誌上亦都睇到很多關於呢件事的報導，例如講政府疑似監管不足、銀行銷售疑似出現問題、投資者可能出現多少損失等。

先講政府疑似監管不足事件。首先我們先了解一下銀行推出產品先的過程，銀行每推出一款投資產品，都必先將該擬推出的投資產品送往金融管理局審查，待金管局審查及批准後，銀行才可在市場上推廣及出售該等產品。而在審批的過程中，那些負責審查的人員，亦要跟從相關的條例及守則去審批，當中亦牽涉一大堆的程序，才可作出批准的決定。

在我的角度看，若說是負責審查的人出錯，不如說制定政策的人，監管政策的人有不足會更加合理，因那些審查人員都是根據相關指引，相關程序來審批投資產品，他們的責任應該是保證該批投資產品符合審批指引，又或延伸至發現指引有不足的地方，該向上級報告；但那些高高在上的、提出政策的、監管政策的人，居然可安然地讓那些不合事宜的政策在香港這個國際金融中心橫行，該道理何在？該權責何在？

雖說審批政策出現不足的地方，但政府亦不是從没做一些實事的，例如它會在各傳播媒介大力地呼籲作出投資決定前先了解清楚，又會設立相關的投訴機制，更會使用公帑為那些投資者注資到消費者委員會為他們申冤。

如要參考相關審批過程可到以下香港金融管理局網址：http://www.info.gov.hk/hkma/chi/bank/spm/index.htm

再講銀行銷售疑似出現問題。首先我們先了解一下銀行售賣產品的過程，銀行擬推出投資產品後，會做一輪推廣活動，跟著投資者可到該些銀行或透過互聯網了解該投資產品，經銀行職員或推廣廣告解釋後，投資者可簽署相關交易文件，交易便告完成。

在我的角度看，若其說銀行銷售手法出現問題，不如說投資產品過份複雜，產品描述過份簡單，那些投資產品，美其名為迷你債券，但其本質根本就唔係債券(其乃行政長官在2008年立法會答問大會上的意思)；而那些產品描述，亦没有充份透露或評估其潛在風險。

雖說銀行銷售疑似出現問題，但最奇怪的並不是這件事，最奇怪的是銀行要問大眾借錢(即要求市民存款於其帳戶中)，為何還可以對存戶諸般苛刻，利率有等於冇，美國減最優惠利率時，本地銀行大可不須跟隨；代存戶投資強積金失利時，亦没有公開向存戶交代事件。

如要參考雷曼迷你債券資料，可到以下網址了解相關資料：http://www.sfc.hk/sfcCOPro/TC/displayFileServlet?refno=0477&fname=08010026-minibond%2035%20ip%28c%29.pdf

最後講投資者可能出現多少損失。首先投資者到銀行開設投資戶口，然後查詢慾購買的投資產品，經過了解及考慮後，與相關銀行簽訂合約，買賣便告結束，其後只要留意該投資產品的表現便可。

若其說投資者蒙受損失，不如說他們不小心投資，不了解投資產品。他們應盡最大努力去了解該產品，了解當中所牽涉的回報及風險，查詢渠道包括各大小銀行，金融管理管、證監會等，亦可透過各類專業的投資顧問公司。

最後在此希望政府有關當局，認真地檢討各樣的審批政策和程序，亦希望各大小銀行及投資產品售賣機構，強化產品披露細則及條款，更加希望各投資者在作投資決定前，應詳細了解本身的承擔能力，了解投資產品當中所涉及的回報及風險。

利益申報
本人並不是金融管理局、證監會、各大小銀行的員工，直致現時亦没有持有相關投資產品，發表此文章之目的謹是提出本人對此事的有關睇法，背後並無任何政治目的，亦没有收受任何利益；若各下對本人的意見有任何睇法，可在本人部落格中的留言版中發表其個人的睇法，而此並不是任何發言邀請，本人亦不會為各發言者承擔任何法律責任。

重提舊事

今日開下自己個blog, 見到一個我基本上唔會搵佢, 但又幾friend的人, 居然無啦啦係我個blog度留言, 擺明係叫我去睇佢個blog, 一睇之下, 發現佢係剛去玩日本玩, 仲要係冇出聲, 仲要同我講去玩都唔叫佢，直到睇到佢個blog寫到尾個幾句，都係算數啦。
話時話，係我身邊的朋友，佢地唔係結左婚，就係分左手，好似冇人係拍緊拖，結婚結左幾年，分手又分左幾年，就係冇人拍拖拍左幾年。
先講下單身，其實我都有好多年冇試過單身，我身邊總係會有我的另一半，但而家我睇返轉頭，單身又真係有單身既好處，至起碼唔洗同另一半交待呢樣，交待果樣。
再講下拍拖，其實拍拖又係三個情況中，我認為係最好既一個，鐘意或者無聊時，就去煩下佢，唔鐘意或者心情唔好時，眼尾都唔洗睇下佢，幾咁free呀。
最後就到結婚，呢個係人生一個重要的決定，當你做左呢個決定之後，就千祈唔好後悔，仲要用你最大的努力去實現你對另一半所作出的承諾‧
最後，真係要認真咁計劃下，找個機會，約晒所有friend，一齊去旅行玩下先，因次次旅行，唔係自己去，就係同另一半去，再唔係就同家人去，總係未試過同friend去。

兩個人

在未開始睇呢篇文章之前，大家再睇一睇個題目，然後停一停，諗一諗，究竟兩個人係指d咩？會係指一男一女？會係指兩個男？會係指兩個女？比一幅相時間你地去諗...諗...諗...諗...
你地個答案係咩呢?係唔係在心中呀‧
我個答案就係當一個咩都唔理既人，遇上一個咩都去理既人‧
兩個好鬼極端，但係又可以相處得好好，又無衝突的青年人‧
首先講下呢個咩都唔理的人，佢成日都話自己咩都唔理，但實際上佢咩都會理，例如：佢見到咩，諗到咩，佢都會講一翻，甚至批評一翻，但係講還講，佢呢個人最終都係無出手，次次都係點人去做，所以就係咁，成日比人話佢咩都唔理。
跟住就講下呢個咩都要理的人，佢成日都話咩都係佢自己做，咩都要佢做，例如插電製，煮野食咁，但係呢d動作全部都唔係佢自己話做，全部都唔係佢諗到要做，只不過係人地提佢先識得去做，做完又要同你講，點解要係佢做，點解唔會係你做，之如此類。
講到呢度，大家又停一停，諗一諗，究竟呢個咩都唔理的人，同埋呢個咩都要理的人，會係男定係女先？又係一幅相時間，諗...諗...諗...諗....

你個答案係咩呀？男定女先？
我個答案就係兩公婆，仲要係兩個結左婚只係幾年，但拍拖就拍左八年幾的兩公婆。
但係話時話，如果你真係夠細心的話，你就會發現佢兩個都有同一個特徵，就係兩個都一樣咁懶。只不過係表現懶的方法唔同，一個懶得去理，而另一個係懶得去做。
果一個懶得去做的人，成日只係得個講字，完全都唔肯出手去做。
果一個懶得去理的人，成日都係得個做字，完全都唔肯用腦去諗。
就係咁，呢兩公婆表面上一個咩都唔理，一個咩都要理，係一個咁鬼極端的情況下，好好地咁相處左八年幾，你地話奇唔奇怪。
係呢度大家又停一停，諗一諗，究竟呢兩公婆，邊個會係咩都唔理，邊個會係咩都要理呢？都係老規矩，一幅相時間，諗...諗...諗...諗...諗...
你地個答案係咩呢？
我個答案係男的又唔想做，又唔想理。女的係仲唔想做，更加唔想去理。
你地到呢一刻係唔係覺得好奇怪呢？點解我個答案會係咁，男的又唔想做，又唔想理，女的係仲唔想做，更加唔想去理。
又係比一幅相時間你地去諗下，我個答案點解會係咁，諗...諗...諗...諗...諗...

其實好簡單，我個答案係咁的原因，只不過係我都唔知點解呢個世界d答案，唔係超低能，就係勁白痴，哈哈哈哈。

最愛是誰

今日諗起一個問題, 那就是(最愛是誰)?
會係你的家人, 會係你的伴侶, 會係你的朋友?
家人---會係佢自己生病的時候, 仲會擔心你會唔會行冤枉路, 會擔心你係唔係凡事忍讓.
伴侶---會係佢自己傷心的時候, 仲會擔心你會唔會做傻豬豬, 會擔心你係唔係向目標走.
朋友---會係佢自己苦悶的時候, 仲會擔心你會唔會冇網址睇, 會擔心你有冇存錢入銀行.
在我的立場, 只要佢係對我有萬分支持, 千般寵愛, 百分感激, 十分欣賞, 就係我的最愛.
其實我的答案真係好簡單, 就梗係(在心中).

仲有一樣野, 我發現原來自己真係欠一個人很多債,
其中包括一間豪宅, 一隻鑽介, 一場婚宴, 一個承諾.
但係我相信, 如果佢真係要追債, 佢一定會要求我還,
一個誠心而有創意,仲要係隆重的求婚儀式.

香港人

本人去過的地方不是很多，去過的國家亦不是很多，直至現在，我去過的國家只有中國、韓國、馬來西亞、泰國、新加坡和美國，但每一次去旅行都有一個感覺，就是香港始終最好。

中國給我的感覺是家的感覺，每一次返去，我都有很多藉口，不願意離開，最奇怪的就是，中國食物的味道，其實和香港的都是差唔多，但唔知點解，我返去次次都會變得胃口好左，食野都食得多左好多。

韓國給我的感覺是新奇，他們國民的民族意識，比起我想像中的強，他們的悉應能力，比我想像的高，不得不佩服他們的護膚技術，人參粉沖水，真的可以令人皮膚又白又滑。

馬來西亞給我的感覺是落後，除了一個地方叫ＫＬＣＣ好點以外，其他，包括雲頂、馬六甲，以至檳城都感覺一般，有點像未經開發的城市，最好的就係，我去到馬來西亞的第一天，遇上了一個賣奶粉的商人，他不計成本的車我到處遊玩，還給我在他的家免費住宿，他的母親巳年紀老邁，但那份對責任的執著，本人真係要向他多多學習。

泰國給我的感覺是好玩，生果好新鮮，水上活動一流，還有他們的變性人，又風趣又玩得，最令我難忘的，都是那一條令人如痴如醉的酒吧街，強勁的音樂，獨特的裝修，真係令我大開眼界。

新加坡給我的感覺就是香港二代，一條地鐵線走天涯，但最令我感動的事，就是一個年老的賭徒，他既不能用英文，又不能用普通話和廣東話與我溝通，但我向他問路，他用了手語指導我後，他再入當地的投注站，畫一幅路線圖給我，記住，呢個時候我巳經走了有一個街口咁遠呀，他的好心，真係令我，畢生難忘。

美國給我的感到是表面繁榮，內裏一般，最記得就是在拉斯維加斯的那一條不夜天街，入到去真係分唔到係日定係夜，還有那條非常短的金門橋，它大風得令人毛骨悚然，仲有一個叫Ｇｒａｎｄ　Ｃａｎｙｏｎ的高山，真係有大地在我腳下的感覺。

但去了多個地方後，始終都係覺得香港最好，著好、食好、住好、交通好、就連玩都係好到無得頂，所以身為香港人的我，真的感到十分自豪，千分驕傲，萬分感動。

成就

為人父母的，最大的成就居然會是「不想自己的兒子再行冤枉路」、「不想自己的兒子再做出衝動的行為」；為人妻子的，最大的成就居然會是「想自己的老公乖乖地生活」、「想自己的老公好好地向目標衝刺」。今天地球先生生病了，身為萬物之靈的人類，最大的成就又會是甚麼呢？

相信每一個人都會有無助無奈的時候，有人會因為無錢開飯而感到無助，有人會因為返工無糧出而感到無奈，亦有人會因自己的父母生病了，而感到又無助又無奈！

咁！究竟身為別人兒子，同時又身為別人老公的人，最大的成就會是甚麼呢？

本人自少便有一個夢想，就是開一間全香港，甚至全世界最豪華的娛樂場所，而這間娛樂場所，是能夠使每一個進入的來賓也得到幸福快樂的感覺，最好能夠同時使每一個没有進入這間最豪華娛樂場所的人，也獲得幸福快樂。

今天，看了很多個別人的部落格，當中真的有很多特別的東西，有些甚至是從前想也没有想過的東西，例如，垃圾房可以起到成個遊樂場咁款，又例如，屋企又可以搞個成個垃圾房咁款，千奇百怪，各式各樣，真的是大開眼界，而且是不能盡錄的啊！

睇到各個特式的設計之時，我又發現了一個好平常，但又冇人會特登提的現象，那就是寫部落格的心態，當我睇別人部落格時，不其然又會睇下每人寫部落格的日期，有人會天天寫，但每次只寫一兩句；有人會每星期寫，每次寫幾段；有人會隔幾個月寫，但每次寫一大篇文章；這個情況就令我聯想到每個人對待自己部落格的態度都是不同的。

有人會當部落格真的是自己屋企一樣，就算只是坐一坐，或者只是沖個涼、食個麵便會出街，也要每天回家休息一會；有人會當部落格是二奶屋企一樣，就算不是時常會去，但一去就可能會係整日唔走咁款的；又有人會當部落格是酒店一樣，好日都唔會去下，但一去到就會用盡所有設施，甚至仲要拿埋紀念品先走咁款。

其實在我眼中，部落格是一個公開的屋企，是一個不用得到屋主批準，別人隨時可以進入的屋企，就係呢個原因，所以我會經常睇下有無人整亂我間屋(即係放毒link)，又會間歇性咁幫間屋裝修一番(即係打新文章)，又或者為間屋擺下裝飾品(即係放新歌)，再唔係就係屋企周圍起多幾條馬路(即係放多幾條常用link)，係咪好得意呢？既可以打發時間，又可以增加創意，低成本，高回報的活動，何樂而不為呢？

八年

在未開始之前，想問大家一個問題，那就是在2000年5月13日，你究竟身在何處？做緊咩？係唔係有d難度呢？但呢一日對某人來講，相信佢點都唔會忘記，因為呢一日佢係落完d，然之後仲要走左去唱k，其間就梗係好玩，好開心架啦。

跟著再問另一個問題，就係想問下，如果你遇上一個又自我，又自私，又自大既人，你又會點對待佢呢？我聽得最多既答案就係，你再唔乖，就冇人再理你架啦；如果我唔理你，又睇下有冇人理你。

八年時間，可以做好多野，例如去泰國，韓國旅行；又可以由幾千元人工，升至幾萬元人工；更可以由毫無感情，變成情感無限；甚至可以由全無關係，變成合法夫婦。

講真如果係我遇上一個咁既人，要我對佢一日，我都想死，唔好講話要對佢一世啦，但係我識得一條友仔，佢不單止要對著佢一秒鐘，一分鐘，甚至要對佢一世，而且仲要係對著佢的每一分，每一刻，都係支持、容忍、寛恕，可想而知呢條友仔，佢係幾咁偉大。

呢條友仔，由執屋，洗衫，掃地，拖地，甚至剪指甲，銻so都一手包辦，講真做咁多野，鐵人都死啦，何況佢係一個弱質女流，最奇怪既就係，佢又可以攪得掂，而且做出來既效果，絶對係好，絶對係出色果隻。

再睇返呢個又自我，又自私，又自大既人，佢好似咩都冇做過，只係為左自己的學業，自己的事業而奮鬥，但係佢又經常同我講，佢咁做都只係為左，將來比一個又幸福，又完美的家呢個咁偉大的弱質女流，但就係咁，呢個弱質女流就同佢講，冇而家又點會有將來呢？

近排呢個又自我，又自私，又自大既人，又再同我講，佢和呢個弱質女流就快八週年，都唔知點慶祝好，最幣就係佢要返工，好多野要做，想慶祝，但又冇時間，就係咁，我一時之間都比佢考起，係呢度，好希望各位幫下呢個又自我，又自私，又自大既人，幫下佢，諗下計啦。

最後，有一樣野想提醒下你地，就係睇完呢篇野之後，千祈唔好去睇2007年5月22日果篇呀！

危機管理

近排看見有幾件事都涉及到危機管理。

我將他們分成兩類，第一類就係自己做錯事而需面對危機，例子，陳冠希及顏褔偉事件，第二類就係受到外來因素而需面對危機，例子，中國雪災及四川地震。

首先講下第一類，這種情況，當時人首先向公眾說明真相，然後公開承認錯誤，再說明公眾因這次事件受到的損害，而作出承擔的行為，跟著接受懲罰，最後等待時間來沖淡事件，這類危機便會自動消散。

跟著講下第二類，這種情況，受害人先要確認危機的種類，完全了解事件的發生始末，然後著手處理事件，在過程中還要不斷慰問受害人士，及檢討受害原因，以免將受害範圍擴大，之後採取善後工作，最後作出檢討的行動，以免重滔覆切。

以上所講的情況，本人就試過很多次，但奈何以前不懂得管理，而弄至本人陷入萬劫不復的情況，所以改了自己做危機之子，來提醒自己，一定要學懂處理這類不快事件。

四川地震

今日已經係四川發生災難的第四天，睇了一連串的新聞報導，真的令人痛心，但就因為這次事件，便令我更明白到要做一個領導難，做一個受人專敬的領導更難。

上幾個月，中國發生雪災，本人就已經感受到生命的可貴，但相比今次的地震，本人就覺得生命及親情也是難能可貴的。

從新聞報導中看見，一堆堆頹緩敗瓦，乾渴的河流，無數的屍骸，又看見那些痛心高哭的受害同胞，那些拼命搶救的熱血英雄，那些專業務實的採訪記者，一幕一幕令人痛心的畫面，作為中國的一份子，作為香港出生的青年，真的要向他們作出無限的支持及慰問。

再講回頭，作為一個讀管理的人，我真的要多多的向溫總理，溫家寶學習，他那一份熱血熱誠，他的無比幹勁，是全心全意的付出給中國的每一個同胞，他全不理會你是富與貧，健或殘，老或幼，只要你是中國的守法公民，他便會對你付出他的愛，他的關懷，甚至面對著失去生命的危險，也要到達地震的災區指揮救援工作，還四出視察災情，更向受災的中國同胞作出支持的慰問，試問這一連串的行動，對一個已上了年紀的人來說，真的是多麼的令人感動，又試問是不是，作為經常被人稱讚有幹勁的香港人而需學習的呢？

從前的我，會覺得地球上那麼多人，多一個不算多，少一個亦不覺得少，但現在的我，便覺得一條生命的誕生，多一個便應活一個，少一個便覺得，少了千千萬萬個。

同樣地，在新聞報導中，看見一個個正在痛哭的面孔，聽見一聲聲正在淒厲的狂嘯，他們那份失去親人的情感，失去信心的情緒，失去盼望的情懷，又真的很令人痛心，又真的很令人難過。

見到一條條被抬出的屍體，當中有的是上了年紀，有的是正值中年，更有的是年少，心裡感到只有一陣一陣的酸，一陣一陣的痛，中國就在短短的幾分鐘內，失去了無數個無價寶，失去了一大批未來社會的楝樑，這種沉重的打擊，為何要發生在這個時刻，為何要發生在這個地球上呢？

最後希望借助互聯網的力量在此作出呼籲，希望各界人士，拿出你們的愛心，作出關懷的行動，向各慈善團體提出捐助，去幫助這一群需要你們協助的中國同胞。

地下鐵

今日睇電視睇到一套電影，故事是講述一個盲妹因一張宣傳單，而結織了一個婚姻介紹所的負責人。這個負責人亦因一次莫名其妙的事件，而弄致雙目失明。在負責人失明的期間，這個盲妹對他百般支持，陪伴他到失明中心，又到公園練習失明人士的生活技巧，感情就這樣地一點一點累積起來，就係這機緣巧合下，最終他們成為了情侶。

假如一天，你只剩十秒鐘可看到這個世界，你想看到甚麼呢？

你會想看到家人、你會想看到愛人、你會想看到朋友、你會想看到事業、你會想看到學業、或者想多看一眼這個五光十色的世界呢？

在我的立場上講，以上的人物或者東西都不是我最想看的，因他們都已經存在我的心中了，他們在我心目中的印象，亦不會因多看一眼而有所改變，反而我最想看的，會是我從來都未用心來看的東西，亦即是自己。

自己究竟是一件甚麼樣的東西？自己又會具有甚麼樣的特徵呢？一連串的問號，一連串的句號，就這樣不經不覺地產生，不經不覺地終結。

到最後，又發現了一樣東西，原來近幾天是不應該食那麼多東西的，因為明知腸胃不好，是應該食一點清淡的東西，例如食白粥，清一清腸胃，這一次給自己一個不小心，不細心的缺點啦！

哥哥

今日係張國榮離開五周年，真的有點失落，真的有點傷感。

記得當年每天都會播放他的歌，在一系列動人的歌曲中，有幾首特別喜歡，第一首就係「追」，第二首就係「紅顏白髮」，第三首就係「為你鐘情」，而最喜歡的就是「左右手」，這一生也在進取，這分鐘卻掛念誰，對我講一聲I DO I DO，願意一世讓我高興，不知道為何你會放手，只知道抱你抱了太久，紅顏白髮，更覺慛燦，。

認識我的朋友，一定會發現我係一個路痴，就好似左右手中的一句，從那天起，我不辨別前後，從那天起，我竟掉亂左右，就係咁樣比哥哥一語道破，你地話係唔係聽哥哥的歌，就好似係檢討自己一樣呢？雖然在一個生活像(良牙)般長大的我，到現在終於找到了我人生的第一個目標『公司秘書』。

而相隔多時，真的又會有好多東西都巳經遺忘，遺忘自己做過(鄉村飛)，亦遺忘自己做過別人心目中的(爛泥)，更加遺忘自己做過(花心少邦爺)，但現在有一個生命中不可缺少的人，她提醒我，打BLOG的目的是不可遺忘的，打BLOG的目的是增加同佢溝通的時間，溝通的機會，其實我想講的是，我都係一個保護主義者，在心中啦！

誰比妳重要，成功了敗了，也原全無重要，追踪一些生活的基本需要，原來早不缺少，有了妳，即使沉睡了，也在笑。

假如現在離開了人間，別人會為我寫一個甚樣的生平呢？見到TVB為張國榮寫的，是他一生在音樂的貢獻，電影的事跡，而我既没有對社會有甚麼建樹，又冇對別人作出關懷，我究竟會有咩比人寫呢？就連自己都唔知有咩好寫，別人又點會知有咩好寫呢？

但如果現在為阿GILL寫，相信我一定會寫她曾經是風靡一時的組合成員，獲獎無數的年青偶像，但做了一件好天真好傻的事，而暫時在家中休息休養。

舊地重遊

今日偶然之下重回自己的舊居，一時三刻都唔知點算好，感覺就好似回到童年時。

重前的我，一起身可能咩都未做，就打開度門放(哨)，然後即刻關門。又或者聽到(哨)聲時，又扮唔係屋企，(浪)起電話，扮失踪。

再唔係就去AMF打下免費保齡，拿下福利。

重有就梗係去IQ打機啦，有機打，有女溝，人間慘地。

唔知點解，以前細個D搵錢能力重好過而家，以前日日去玩，晚晚唱K，飲酒成打成打咁叫，而家出街食飯都話冇錢，飲酒一啖就醉。

今日當然有去以前成日去果個沙灘啦，果D不為人道既感受，不為人道既場面，不為人道既經驗，就梗係不為外人道啦。

最後的一站，就必然會係舊居啦，第一次返去冇密碼，跟住又無啦啦個密碼又飛埋來，方死我唔死得咁款，好啦返到上去，第一時間就係上十六樓啦，睇下舊居，有條藍色布，睇唔到有人開燈，見到度閘就來爛咁款，然後走去後梯坐左陣，又聽到個friend講，話叫條女返下工，扮下乖，都唔知佢為咩，正白痴。

跟住行樓梯，睇到以前濆既油，地下刻既字，百年如一日，感覺未變過。

仲有第一次見到古惑仔個老婆同小古惑，佢老婆上次扮神秘，仲以為會係咩貨色，原來都係...，而小古惑，幾個月又話識行，原來唔係我d朋友怪，就連各人的後代都怪，有個直頭連老豆係邊個都可能唔知(估中冇奬，仲要有罰)，忽然諗起小古惑大過會唔會同我爭女呢？

就係咁，最後去啓豐食左碗面就離開左呢個帶比我好多開心，極少傷心既地方。

到而家，始終都係覺得果度係最正既地方，因為搬左冇朋友，搬左冇女友，搬左冇辟酒(友)呀！

PETS

開咗個blog咁耐，都未試過寫寵物，今日就試下寫寵物啦。

以前我養過好多種寵物，有龜、有兔、有狗等。但最深刻的都是狗。

唔知係唔係自己唔識養，養親都冇咩好結果，到而家死的死，走的走。

講到養狗，自己養過兩隻，一隻叫JESSIE，JESSIE係班點，另一隻係BAL。

JESSIE佢好謂食，又好大隻，企起身同我一樣高，最記得以前佢做錯事，就一定會走到餐枱底，又或者打佢時，佢又好醒咁，搵我阿媽做擋箭牌。重記得以前同佢落街玩，佢一定係屋企樓下的一棵樹度柯，就好似農夫咁，種大棵樹有得分咁。同佢落街最好的就係唔洗拖住佢，佢走到咁上下，又會望下你，試過有一次我扮失踪，佢四圍搵，到最後就梗係比佢搵到啦，所以佢係我心目中係最聽話的寵物，但呢D都唔係我最深刻的，我最深刻的係它死前一刻的一聲：「烏」！

BAL佢好惡，成日鬥人，佢唔理你係做咩，總之鬥左先算，最記得係佢死前，可能係有老狗痴呆証，佢的記憶好多都冇咗，就連邊個係主人都唔知，就係咁，係為佢好的情況底下同佢說再見。

唔知係唔係呢D咁既經歷，我到而家都冇再養過寵物了，因自此以後，我相信多一份感情，多一份悲哀；多一點心機，多一份傷感。

Decision

決定有時真係好難，一個決定可以影響好大，又可以影響好細，全在乎有幾多個可能，又在乎觀點與角度，有時作了個自己認為很好的決定，但在別人心目中它是不好的，又有時作了一些不好的決定，但出來的後果遠遠出乎自己的意料之外，好笑唔好笑？

就好似一套電影「早熟」裡，黃秋生以為自己為女兒作出很多他以為很好的決定，但在女兒心目中卻不甚討好，甚至惹來反感，又好似房祖名作了承擔責任的決定，但就偏偏令女方的家人討厭，所以作了個甚麼決定其實並不重要，最重要的是那個決定會帶來甚麼後果，帶來甚麼結果。

就係咁，令到好多人都以為做事過程唔重要，最重要都係結果！但有時就係個過程，而影響左個結果。舉個例子，種瓜應該係得瓜，或者係失敗，種瓜點都唔會係出豆。

到最後，提醒自己一句：想要有好結果，就必先要有好過程；想要過程好，就必先要付出努力。

Blog

Blog呢個字根據Yahoo的網上字典解釋為 web log 博客; 部落格; 網路日誌 (是繼email、BBS、ICQ之後出現的第四種網路交流方式. 通常由簡短、經常更新的帖子構成. 這些帖子按照年份和日期倒序排列, 故稱“網路日誌”)。

我相信現今年青的一代很多都會認識，更加會寫，甚至會使用它作很多的用途，但又有幾多人會持之以恒的使用它。

我認識的朋友當中，很多都有自己的部落格，但寫的只有幾個，好一點的就幾個月會寫一次(其中之一是本人)，有的根本連自己部落格的密碼都忘記得一乾二淨，但就絶少會天天寫，時時寫，甚至分分寫。

其實寫blog並不是一件很難的事，只要花一點時間，加上打字的技術，便可完成一個自己的網上日記薄。但人總是誅多藉口一天一天地拖下去，說今天有好多野做冇時間寫，又說今天冇咩特別事發生就唔寫，更加說自己的事記在心中就得扮自我保護又唔寫，這樣花了很多心機去登記的部落格就被自己冷落了。

話時話，剛剛才從頭到尾睇過一次自己的blog，又真係百般滋味在心頭，由2006年到而家2008年，足足有六十幾篇文章，平均十六日寫一篇，最長的一篇有成三千字，最短的得幾十字，當中有中文亦有英文，但發現講得最多的就係普選，其次就係一d自己寫完都唔知寫咩的事，好似「伴我行」和「真的怕了」咁，就真係連作者(即係本人)自己睇番都唔知寫咩，更加唔好話知點解會咁寫啦。

其實，blog呢個發明又真係幾好架，可以用來打發時間，又可以記低生活瑣碎事，更可以發表下自己的個人觀點，一件工具，多個用途，仲勁過果隻可以一次過實現三個願望的蛋。正！

選總統

睇見台灣近日的選總統新聞，真係覺得又攪笑又煩。

攪笑係聽到又話上人地總部查有冇出現大選舞弊，又話人地家人有外籍身份，仲要話開放市場唔好，就係咁成個台灣好似剩係得選總統一件事要做咁，勁攪笑。

煩係因為聽黎聽去都係果d台灣選舉情況，重複又重複，就好似西遊記中的唐三藏對待孫悟空那樣，日哦夜哦，煩都煩死啦。

以上的例子都唔出人意表，最出奇的就是台灣有二千幾萬人口，動不動都可以有成百幾二百萬人上街遊行，動不動就可以全街冇人，真係來無踪去無影，超級忍者。

相信最開心都莫過於台灣的電視台，就係因為呢次選總統，無啦啦就增加左好大筆的廣告收入，他們真的要多謝馬英九同謝長廷呢兩位又出錢又出力的候選人啦。

不過有了台灣的選總統經驗，本人相信將來香港普選特首，就會用一些聰明的方法，不會擾亂社會秩序，不會防阻香港經濟，更加不會出現攪笑同煩的新聞，台灣真係一面好鏡子呀。

A-Level

After this week, I have to learn economic and accouting for A-Level Exam.
On the true talk, I must pass this exam because my education level have exceed this level, this time, I just want to try once, based on my characteristic, I will review some book and work hard for that, at last hope me can have enough time to do that la.

禮物

在香港娛樂圏，近期發生最大的事情莫過於肥肥的去世，今日睇完她的追思會特輯，本人真的有一點感動，而感動的不是一位明星離我們而去，感動的不是再不能聽到她的笑聲，更加不是有多少她的老友記到場支持，而是感動肥肥對欣宜所付出的愛、所作出的關懷。

相信天下間的父母，他們都很掛心自己的兒女，正所謂「養兒九十九，長憂一百歲」。

在今天看過追思會後，聽到有很多肥肥的朋友，說會支持欣宜，會照顧欣宜，我並不覺得有什麼特別，我反而覺得特別的是欣宜的說話，她很淡定、她很大方，面對著自己的媽媽離開的事實，面對著千千萬萬來自不同界別對她無限的期望，亦面對著傳媒不斷的追問，亦可做出相當淡定的態度，相當大方的行為，這是難能可貴的表現。

作為兒子的我，我只相信一件事，最佳回報父母的禮物就是活好自己的人生，在自己的能力範圍下，做到最好，做到最完美。所以我從來只會專注於自己的事業、自己的學業。我在新年前定下的一個目標，那就是做一個成功的公司秘書，做一個出色的專業人士，有了言個目標，我便向著這目標努力進發，向著這個目標衝，這就是我唯一可送給父母的禮物。

本人性格比較自我、衝動，猶記得在父母離開機場時，他們都再三叮囑，凡事小心，凡事都要忍讓，雖然到現在本人亦不能完全做到，但亦已收歛很多了。

早排，有一個很要好的朋友，他的爸爸亦離開了他，回想起，在我身邊的朋友都不約而同地都是爸爸先離開的，但他們都表現得很淡定、很大方。

記得早幾年，有朋友的的爸爸離開時，我只陪伴他到卡拉ok舒發感情，他亦於那刻唱了一首『單車』送給他的爸爸，他更對我說，在他爸爸離開的一天，他相約了一位已分手的女朋友，訴說他內心的感受。近排有朋友的爸爸離開時，他亦很孝順地陪伴他的媽媽，在他們的面上亦看到一絲絲傷感，一絲絲的掛念。

每人都會有自己的父母，每對父母亦都會對自己的兒女有不同的期望，本人相信只要各人都做好自己的本份，那就算有再多的期望，再多的抱負，都能一一實現，一一達成，亦只有這樣，才是盡了作為兒女的最大責任，送出了最佳的禮物。