預算案

有投資大師講過，時間就係良好企業既朋友，亦會係不良企業既敵人，因為一間企業短時間有盈利就通街都係，但要保持長期有盈利呢就真係少中有少啦。

同樣道理，我地亦可以用時間來睇清睇楚，究竟有冇「做好呢份工」，究竟係唔係「幫助唔大」、究竟係唔係呢個情況下「蝕呢個數係可以叫做有交待」。

講真，呢份財政預算案未出之前，根本上就唔會對佢有咩期望，話就話有咨詢渠道，講就話係主流意見，係未見到事實或者數據之前，都係半信半疑，客觀d睇，香港人都係睇事實，睇數據者，如果政府公開佢收集到d咩意見，而d意見大約係點分布既，咁香港人咪知咩野係主流囉。

同埋最令人唔開心既係，香港高官薪酬己經係偏高，仲要話減薪實際幫助唔大，大家可以計一計，全香港有16萬幾名公務員，每人只係減一蚊，就可以比4個大學生實習一年，如果唔想影響16萬人咁多，可以剩係唔請一個金管局總裁，就可以比大約286個大學畢業生，參加大學畢業生實習計劃一年呀，效果好明顯啦。

如果按財政司所講，中產係有儲備既，所以一時三刻減少人工，佢地應該可以靠自己既儲備應付，咁我係呢度就大膽咁建議，「特首，三司，金管局總裁」最少都獲列入中產既行列，所以一時三刻既減薪，佢地都可以應付既。

呢份財政預算案令人覺得最可取既係，比左一個機會電視台，發揮佢地既專業報導精神，電視台當日報告財經新聞時，就有一個好特別既手法，佢將財政司幅相放係恒指條線度，然後就講，當財政司一路宣讀財政預算案，恒指就一路跌，當宣讀完畢，恒指就止跌回升。

仲有一樣野，我覺得「財政預算案論壇」同「財政預算案記者招待會 」裡面，主要都係記者可以問問題，同埋有部份既問題，有部份既答案，好似重覆又重覆咁。

總之呢一份係由無期望轉到失望既預算案呀。

財政預算案網址：
http://www.budget.gov.hk/2009/chi/webcast.html

我

每一個人都有過去，有d人會有開心既童年，而我的童年，亦都係開心既，不過同人地唔同既，就係我既童年快樂係來自朋友，唔係來自屋企。

人地細個就有父母同佢地一齊去呢度去果度，而我就係同朋友去呢度去果度。

一起身，唔係去打機，就係打保齡，夜晚唔係去唱k，就係去落d，啤酒日日都幾打幾打咁飲，飲完食飽又玩過，玩到天光就返屋企訓，都不知幾快活。

我亦試過日頭返學，夜晚返工，零晨溫書，更加試過日頭返工，夜晚返學，零晨做功課既日子。

試過有人問我，如果可以再揀，我會揀咩既人生，我諗都唔洗諗就答佢，就算有得再揀，我都揀同一條路，同一段人生。

試問有幾多個人可以好似我咁，試過日日都吃喝玩樂既日子，亦都試過日日挨更抵夜既日子呀。

人生有起有跌，歡樂繽紛，天昏地暗，都可謂「對得住自己，對得住人生啦」。

對我來講，日日要食包係慘，日日食公仔麵係褔，點解我咁講，因為我試過每日都只係食麵包，食足半年，亦都因為我試過，係我肚餓既時候，有人請我食麵，包足三餐，就係咁，美味佳餚都不及一碗充滿溫暖既麵，一碗熱騰騰既麵，勝過某大連鎖店既包。

我好珍惜別人對我作過既幫忙，亦都好痛恨每一次跌低都要自己排起身既感覺，一個人既意志可以支撐出一個未來，一個人既行動可以創出奇蹟，所以最後我都係覺得“我就係我”。

富貴

我相信一個人擁有既財產主要都係分為兩大類：自身以外既，自身以內既。

自身以外既包括金錢上既，物質上既。

自身以內既，我就將佢放左係兩個地方，一個放係個腦度，另一個放左係個心度。

放係個腦入面既財產，我本人覺得有知識同記憶，呢一類財產有一樣特性，佢會隨著一個人既長大而有所增加，但係到左某一特定既時刻，又會隨著身體狀況而流逝。

而係心入面既財產，我就將佢分為人既七情六慾，呢一類既財產又有一樣特性，佢會係隨著外間既事物而有所增減既。

一般既人口中所講既富豪，普遍來講係富在自身以外，亦即係比起其他人，擁有更多金錢，或者擁有更多既物質。

而我眼中真正既富豪，佢地不單只要表面富貴，亦都要充滿智慧，更加要內心充滿情感既。

不過無論點都好啦，富豪又好，一般平民百姓都好，佢地都只會係擁有一條命，一次生存既機會，怱怱人生幾十年，都係應該珍惜自己所擁有既一切，珍惜自己既生命，就好似買雷曼迷債咁，唔會有take two架。

成績表

香港既上市公司開始陸陸續續派成績表，相信有好多人都會關心，佢地所投資既公司，在過去一年既營運表現，佢地所投資既公司，管理層在過去一年既管理能力。

在過去一年，香港既經濟環境，不斷咁受到衝擊，相信好多公司都會有一份唔係咁好既成績表，但係呢個咁既時候，又有冇人會為自己過去一年，去做一張成績表，睇下自己係過去有咩做得比較好，而有咩做得比較差呢？

其實檢討同監控對一間公司來講，都係一個好緊要既程序來既。

係呢度請容許我，打一打開我個書包，講一講管理既流程。

管理，首先要做既第一件事就係定立方向，建立目標。古語有云：「萬事起頭難」，咁究竟難在d咩呢？其實難就難在唔知做d咩先至好，有人話「唔熟唔做」，亦有人話「自己有咩興趣就做咩啦」，但係我就會話「做咩係對自己有最大益處既，就做咩」。

我對「唔熟唔做」呢句說話真係好有保留，因為就算你對一樣野熟既程度去到透徹既階段，係唔係就代表呢樣野一定可以令你得益先，係唔係可以保證你做呢樣野，就算有損失，亦都係最低損失先，以我所睇，「唔熟唔做」極其量都只係可以幫你節省探索研究既時間，就唔一定可以保證獲益或者減少損失。

至於以興趣為前提就更加有保留，用興趣去決定做咩，以我來睇，極其量都係保證你會持續有心去做一件事，亦都唔一定可以保證獲益或者減少損失。

但係用最大得益做決定因素就唔同啦，睇字面都睇得出，話到明最大得益，即係唔會有第二樣野可以令你獲得更多，做得更好啦，就算係咁唔好彩係，遇到有損失，亦都會係最少既損失。

講返轉頭，定立方向，確定目標其實有好多好處，首先可以係制定過程既時候，更加了解自己既情況，亦可以安排下用咩方法去做，更可以計算下要付出幾多，有幾多收獲。

有左目標之後，應該要係咁多個可行方法之中，揀下邊個方法去做先至最好，因為做一件事方法有好多種，但就並唔係每一個方法都係可行既，亦唔係每一個方法都可以達到我地既目標，更加唔係每個方法都達到最大得益既，係呢個時候，可行性研究測試就幫到好大既忙啦。

有左咩目標，知道用咩方法之後，就應該係時候落手落腳去做啦，不過係做既時候亦要留意，究竟點樣運用手上既資源呢，點樣帶領員工達成目標呢，同埋要留意成個外圍環境有冇咩改變左喎。

最後就係要睇下，自己係做呢樣野既時候，做得好唔好，有冇咩係做錯左既，有咩可以再改善既。

就係咁，管理既四大範疇Planning、Organizing、leading、Controlling 就出左來啦，唔明既就自己比d心機諗下啦。

講返自己過去一年既成績，有好既地方，亦有唔好既地方，總算不過不失啦。

情意結

每個人都會鐘情於某一d野，例如，有人會鐘情於自己的老公老婆，又有人會鐘情於儲郵票，又有人會鐘情於做運動，而我就會鐘情於呢個股票市場。

近排睇到一d新聞，話有人持有一隻股票長達45年，老實講，45年就幾乎有兩個我咁大呀，佢買呢隻股票相信都係諗住收息架，因為呢隻股票，試過係好短既時間內，以倍數咁上升，如果呢個投資者當時就賣左佢手上果批股票，佢既身家肯定就唔可以睇少，但就因為佢對呢間公司有情意結，所以連呢間公司有試過冇息派，佢仍然持有至今。

係香港，要數普羅大眾有情意結既股票，我諗都係非獅子銀行莫熟啦，呢間銀行就連金句都有好多，好似「聖誕鐘，買匯豐」、「有買貴、冇買錯」之如此類啦，佢既影響力就連倉頡輸入法都有佢個名，你唔信可以試下，你打個“匯”字，佢就會出埋“豐銀行”比你，講真，係倉頡入面，會自動出埋公司名既公司，真係唔係有好多間架，仲有呀，有時聽新聞報導，話匯豐既股價係咁跌，有d財經新聞報導員就會講：「大笨象既股價跌到連投資者既血肉長城都頂唔住呀！」，可想而知，呢間銀行係香港既吸引力有幾咁勁，連投資者都寧願拿血拿肉拿埋長城去買，都要頂住佢既股價呀，一間公司可以做到咁，你話係唔係唔野少啦。

我就唔係鐘情於銀行，反而我鐘情於地鐵啦，而我點解會鐘情於地鐵，其實係有段故既，雖然地鐵既股價都尚算穩定，佢既派息都尚算吸引，但我就唔係因為呢d原因，我係因為佢既一封接納信，一個邀請既電話，因為呢樣野就令到我以前學校既老師對我括目相看，亦都因為呢樣野，打破左學校一路以來既紀錄，我份報告既分數，哈哈。

我因為做畢業報告既題目係研究地鐵，於是我就膽粗粗咁，用學生身份寫左一封信去地鐵，話我想睇下佢地既經營情況，老實講，用學生身份去約上市公司，而成功既機會率係微乎其微，不過好彩，之後隔左幾日，佢地既公關部真係打左個電話我，然後又寄左一封信比我confirm，所以我就係咁既情況底下，對地鐵有左一份情意結啦。

雖然我對地鐵係有一份情意結，但我由始至今，都冇試過買地鐵既股票，不過我都因為呢個情意結，而搭多左地鐵，比多左生意佢做，以表示我對佢既一份支持。

其實有時，一間公司既成功係有好多既因素既，情意結就係其中一種啦，正所為「你對人好，人對你好」，公司令人對佢有情意結，咁公司咪多d生意做囉，公司既股價咪有支持囉，想通過決議案都易d啦。

富豪榜

早幾日有一份報告，果份報告係公告一d富豪既身家變動，講真呢份報告，對普羅大眾來講，又好似冇咩直接關係，但係裡面都會有d野睇到既，第一，係睇到大部份既富豪身家都縮左水，第二，係睇到香港既經濟真係唔係幾好，第三，睇到有咩公司係環境唔好既時候都有唔錯既表現。

首先，d富豪身家勁縮水，最勁果個話縮左九成，就連香港首富都要唔見近半副身家，係正面d既角度睇，一場金融海嘯，將香港貧富懸殊既距離拉近左，又或者阿Q咁睇，自己既理財技術又唔係同d高手差好遠者。

但係諗深一層，富豪既身家，分分鐘佢自己本人，都未必可以時時刻刻咁容易計到，未必真係可以咁清楚計算得到，所以我睇呢份報告，都係抱住得個知字既心態去對待，再講，富豪既財技其實真係一d都唔差，佢地身家縮水，好可能都係因為上市規則，限制左富豪既投資方式，或者限制左佢地既投資時間，所以近期港交所想改上市規則，d上市公司會咁關注呀。

跟住，香港既經濟真係比早排來講差左，富豪既身家好多時都會投資係股票或者債券之類咁，個股市唔好，香港經濟好極有限，若然股票市場真係快過經濟半年到，咁就真係仲有排捱呀。

等我地返去較早既時間睇一睇，股市最高位係2007年年尾11月7號，出現過大約31897點，然後一直向下跌，跌到2008年既10月27號既10676點既位置，先至出現一輪反彈，去到2008年既12月17號15544既位置又再下跌，直致今日大約13016點左右。

細心既人計一計數，由最高位去到低位，跌左成21221點或者66.5%。如果係計日數，有成468日先會出現反彈，由10月27號去到12月17號，升左4868點或者45.6%，即係升左50日，又開始跌過，直到今日跌約2528點或者16.3%，即係63日，加加埋埋，真係冇眼睇呀。

呢份報告，仲睇到有咩公司係經濟唔好既時候仍然會有表現，好似比較頭果d，仍然係地產或者電訊公司既老闆，然後係二廿幾三十既就係飲食業或者服裝業既老闆，剩係睇唔同行業既老闆，你就知係香港做咩會有錢d啦。

有時諗一諗，富豪同普羅大眾既關係，真係有d似香港既股市咁，富豪似藍籌，中產似二三線股，普羅大眾就似四五線既股票，而呢個富豪榜就似恒生指數啦，將富豪既身家加起來，然後將個數目加權，咁就得出呢份報告。

恒生指數係會每季定期檢討，按一d原則，將一d合資格既公司，納入藍籌行列，而剔除一d今日唔同往日既藍籌，所以今日係富豪，聽日可以比二三線取代，今日係四五線，聽日亦有機會係富豪，既然係富豪同普羅大眾似股市，香港人就要更加努力，更加用腦，本人相信總會有出人頭地，或者大富大貴既一日既。

情人節

今日係情人節，同你地既情人有咩慶祝活動呀，行街買野、食情人節套餐、睇戲，定係放私人煙花呀？

我今日就同老婆去左食茶餐廳中式晚飯啦，而我已經係早幾日就買左禮物比佢啦，仲要係佢鬼死咁開心咁講，“大減價呀，好鬼死抵呀”，我買左咩比佢，你地自己問佢啦，而我今日亦都收到我既情人節禮物，我都好鐘意呢份禮物，呢份禮物其實係聖經來架，點解我會咁鐘意呢份禮物，因為呢本並唔係基督教或者天主教既聖經，而係投資界裡面，好多人都會當佢係聖經既“Securities Analysis”，中文譯作“證券分析”。

今日行街見到一個現象，等我用故事形式講出來啦。

係情人節，有一男一女行街，佢地行行下經過花店，咁好自然就走入去睇下有咩花買啦，然後睇左一陣，佢地就決定買一束玫瑰花，價值$400蚊，然後個男仔比$400蚊買左呢束花，跟住個男仔就將呢束花送左比個女仔，買完花，送完花，收完花之後，個男仔就同呢個拿住花既女仔繼續行街。

好啦，故事講完，你地係呢個故事睇到d咩呢？我今日亦都有同我老婆講過呢個故事，亦都有問佢睇到d咩，佢個答案都係，好女仔既角度，同我講左d好女仔既野，而我既睇法係：

個故事中，有三個人物，第一個係賣花既花店，第二個係個買花然後送花既男仔，第三個係個收花既女仔。

花店，佢承擔左賣唔出花既風險，後來係情人節，佢就收回$400減成本既回報。

男仔，先付出$400去買果束玫瑰花，然後將束花無條件咁送左比個女仔，即係先付出$400蚊交換一束花，然後將呢束用$400換返來既花送比個女仔，講得清楚d，個男仔先冇左$400，再冇左一束玫瑰花，簡單d講，係情人節，個男仔係雙失，有付出，但冇收穫，要承擔成本，但冇回報。

女仔，完全唔需要承擔任何風險同成本，但最後就收左一束價值$400蚊既玫瑰花。

係呢件事上面，有兩個贏家，第一個係花店，佢做成一單生意，收回成本或者仲可以賺取利潤，第二個，亦即係大贏家，毫無付出，但係收到一束玫瑰花；而係呢個故事入面，亦出現左一個輸家，佢就係呢個男仔，佢又要付出，但毫無收穫。

其實贏輸既野好閒啫，贏前輸後，贏後輸前，唔洗太過根根計較。

但係風險與回報，或者成本與回報，就真係要小心計清計楚啦。

好似呢個情人節故事咁，承擔左風險，唔一定有相同價值既回報，付出左成本，又唔一定可以獲得相同既回報。

最後提醒一句，係投資界有一句說話係：「有高風險，要求高回報」，並唔係一般人所講既：「高風險，高回報」，千萬要記住分清楚呀。

蟬的故事

樹蔭有一隻蟬，跌落你身邊，驚慌到失足向前，然後撲入我一雙肩。

原本呢一隻蟬，有一棵好舒適既大樹為家，有一個好溫暖既雀巢為室，但就係因為，有你的經過，有你的吸引力，而跌落你既身邊，但係當呢隻蟬落地果時，發現跌錯左位，然後就扮驚咁蹼向前，借d意就撲入左你既膊頭度。

好多人都會覺得呢隻蟬好傻，有咩理由，放棄一個咁好既樹蔭，而投向一個根本唔知有冇前景既你身邊，但係有冇人為意到，對呢隻蟬來講，佢根本就唔介意同你一齊有咩回報，佢可能只係想同你一齊，去找尋一段刻骨銘心既愛情故事，佢甚至唔會介意同你一齊之後，佢要再投放幾多，再投入幾多，佢只係要求你對佢好，對佢公平者。

但係，世界就係咁架啦，呢隻蟬越想有個照顧佢既你，而你偏偏又就係為左自己既事業，為左自己既前途，一次又一次咁，將呢隻蟬放埋一邊，更離譜既就係，你仲要諸多藉口咁，將呢隻蟬既願望，押後再押後，就係咁，呢隻蟬就成日係度諗，自己係唔係做錯左呢？自己係唔係揀錯左呢？差d攪到呢隻蟬神經失常添。

好彩，個天都係公平既，個天係上面見到呢個情況，於是就運用左佢強大既法力，將呢個咁樣既局面扭轉，個天首先令到你洗心夾面，等你良心發現，從頭到尾咁再睇一睇自己，亦都再睇一睇呢隻禪，然後又賦予更大既權力比呢隻禪，等佢可以將呢個冇良心既你，由頭到尾咁鬧多一次。

就係咁，呢隻禪同你，係一個無厘頭既情況底下，大團圓結局，實現左一個又溫馨，又浪漫既愛情故事。

承諾

記得以前講過一句說話，就係一個人，應該係有能力既時候，盡量為呢個社會做多點事。

古語有云：「修身、齊家、治國、平天下」。

我不斷做緊既係修身，包括增進內心既修養，為我既腦注入新既原素。

而家做緊既係齊家，因為我要兌現我既一個承諾，“無論遇到貧窮或者疾病既時候，都對我身邊既人不離不棄”，係我有能力既時候，盡量投放更多時間係佢地身上，務求兌現我開左既一張「一生幸福」既支票，為我老婆同我個仔，舖放一條康莊大道。

好似今日咁，有少少時間，都抽左來陪佢去左香港國際機場行街。

點解今次會揀去機場呢，一來係因為近，二來係因為機場擴建左二號大樓，再加上我同佢都未去過機場博覽館，所以今日走去睇下。

係機場二號大樓裡面，有4d超立體巨幕影館、挑戰擂台、航空探知館、星光無限。

4d影館其實係一間戲院來架，佢今期主要係播3d零零狗，雖然我因為要成做幾鐘，所以冇睇到，但相信都會好過係戲院睇，話晒都係4d呀，戲院極其盡都係3d。

而挑戰擂台其實係一間機舖，裡面有各式各樣既電子遊戲機，包括有九個籃既籃球機，有打拳機，有保齡球機，不過最好玩既都係果部高爾夫球機，唔玩由自可，一玩就，唉！發現自己原來仲未做好做富豪既準備，好在老婆都同我不相白仲，嘻嘻！

航空探知館，呢個地方係我最鐘意既，佢裡面展示左好多香港機場發展既歷史，仲有好多關於飛機既知識，好以飛機引擎咁，就真係令我大開眼界，原來引擎既推動力係來自風，係來自氣流，然後將空氣壓縮，燃燒空氣，產生衝力，推動飛機起飛。

其實當我第一次搭飛機，我已經覺得駕飛機係一件好難既事，過左今日，令我更加覺得呢個想法冇錯，駕飛機真係一件超難既事。

星光無限呢個地方擺左好多電影既戲照，仲有好多用來拍電影既戲服，不過就要每人收二十元既入場費，好彩呢二十元既入場可以當現金咁係場裡面用，但係一鑵可樂佢賣成十五蚊，見人見智啦。

到最後，我同老婆去左一間叫天下餃子食野，呢間既野食又真係幾好味，雖然係小小既幾舊餃子，一碗小小既上海麵，不過都係我同老婆既愉快心情之下，變得更加好味。

回顧以前去過咁多個機場，都係香港既機場出色，要食有食，要玩有玩，要買有買，應有盡有，仲有佢既設計，簡直係走係時代既尖端，無懈可擊。

過左今日，又係時候安排下次既拍拖旅程，盡量做到事業家庭兩兼得，最好就做到治國平天下啦。

認輸既feel

贏同輸係我心目中其實唔係好緊要,有時贏左都唔代表我有咩著數,輸左又唔代表我有咩損失.
舉個例子,贏左場架,冇左個家,相反,輸左面子,得到朋友.
表面贏左有咩用呀,相反,表面輸左又點呀?
贏頭輸尾,輸頭贏尾,贏左有著數,輸左冇面子.
贏錢輸面?贏面輸錢?你會揀咩呀?
思海藏賭陣,後著驚天人,呢句先叫勁.
就好似比賽咁,你可以買自己輸,然後就真係輸左,咁輸左場比賽,但贏左大筆奬金.
總之,唔洗咁在意贏定輸,最緊要係有冇著數,贏得到野多,定係輸得到野多.

講feel唔係好似我,講實際合我心意多d.
feel呢家野太飄忽,根本上都冇定律,如果夾硬來講,我諗都係,當發生左一d對自己有利既事件,咁咪合feel囉,當發生左一d對自己不利既事件,咁咪唔合feel囉.
所以若果要長期保持feeling good, 係要自己去創造環境既,淨係坐係度,淨係識埋怨,我話比你聽,你一定會長期唔合feel.
但係講feel始終都係比較唔穩定,最好都係講實際,或者睇開d,太過執著,只會令自己眼窄,只會令自己原地踏步.
試諗下,連心情都咁唔穩定,又點會有好成積呢?就算係有,都只係得50%機會率,有50%會比心情唔好而令到計劃失敗,所以講feel既代價,係可以好大既.

廁所

有人講，要睇一個國家文唔文明，最好第一時間去睇下佢地既廁所，如果國民就連去廁所都保持衛生，佢地既文明就至起碼都有基本既水平。

係香港，公廁呢家野，一般都會分為男廁、女廁同殘廁，基本上係唔收錢既，但有d商場內既廁所，就會要求你有鎖匙先可以用，而有d商舖，就要你係佢地既客人，先會借廁所比你，我去旅行既時候，發現有廁所仲係要收錢既，咪係咁，就攪到呢d人通街攪掂，d地方咪污糟晒囉。

而我今日就同老婆去左一間廁所，一入到去，發現d人都唔係因為急而去既，仲要入到去有人招呼添，仲有發現到d人去廁所，又唔洗除褲，又唔洗拉拉鏈，呢個廁所，係唔係好怪先？

初頭，仲以為有廁所男女一齊去，咁作為一個已成年既我，一定會有野諗到，但係原來呢個廁所係一間餐廳來架，d人入去就梗唔除褲啦，入到去就梗係有侍應招呼你啦，哈哈。

呢間野，主要係台式餐廳，但係都有西式既餸菜，都係唔講咁多啦，自己睇相啦。

兩公婆

做錯野既時候，你會做d咩呢？

消極既人，佢地會唔知點算，或者會選揀逃避責任。

普通既人，佢地會道歉了事。

積極既人，佢地會承擔責任，然後找尋犯錯原因，跟住作出補救行動，再不斷跟進，務求將負面影響減至最少。

而我老婆，對住成日犯錯既我(而究竟係唔係犯錯，其實好多時都係一d好主觀既判斷)，就採取左一個超級積極既態度啦。

佢就第一時間，會係佢心目中既計分制度大扣特扣(講清楚d，咁多年以來，佢都只係有扣分既制度，係冇加分既)，扣完分之後，仲會大鬧特鬧(講清楚d，佢會由相識至今，所有我既錯，由頭到尾，完整不漏咁講多次)，然之後，走去訓覺(講清楚d，佢會係個心度，再由頭到尾咁，數多我一次，務求數到我一文不值)。

而我呢，我對住佢，我都會採取好積極既行動，我會好積極咁同佢講，“唔好理佢啦”，“得架啦”，之如此類既說話。但係千祈唔好以為我講唔好理佢，就真係可以唔洗理佢喎，我越講，我老婆越嬲，而佢越嬲，我就會越笑得過成穏。

好多時就係咁，扣下鬧下講下笑下，咁又冇事Lu。

有時係別人眼中，我同我老婆係一對好得意既夫婦，但係我覺得，由相織到今時今日，其實我同佢都唔係好多特別話題，基本上大家都明白，好多野唔洗點講，心照啦，最特別既係我同佢都冇估錯過對方既諗法，大家都知對方想點，咁就OK啦。

所以係我既角度睇，我就唔寧願做隻貓，我就唔寧願做隻狗，我就寧願做情人啦，哈哈！

雙春兼潤月

今年係雙春兼潤月，而根據過往既紀錄，呢d年份既結婚比率都會高d。

多左人結婚意味著咩呢？我就覺得意味著各行各業都會幾好。

第一，意味住做婚嫁生意既應該會幾好。多左人結婚，佢地一定會提高對婚嫁服務既需求，而多左人消費係d婚嫁服務，做婚嫁生意既必然會因而受惠。

第二，意味住做嬰兒服務產品生意既會幾好。多左人結婚，意味著多左人會考慮生兒育女，香港既出生比率提高，做嬰兒服務產品生意既必然會因而受惠。

第三，意味住做細單位買賣既地產商會幾好。多左人結婚，意味著細價細面績既樓會多左需求，多左人想買樓，做細單位買賣生意既必然會因而受惠。

第四，意味住做結婚宴會生意既會幾好。多左人結婚，意味著多左人會擺酒慶祝，做結婚宴會生意既必然會因而受惠。

除左睇有咩行業，或者咩公司會受惠之外，我地都要睇下，係雙替兼潤月，會有咩風險先得。

當中最明顯既，就係離婚既潛在風險又會提高左，多左人結婚，意味著多左人有條件去離婚，而多左人離婚係一個危機，但係我相信，聰明既香港人，係有能力化危為機既，就好似離婚咁，佢地都會係當中搵到商機，例如替人辦理離婚手續，幫人計算膳養費咁。

就係係雙替兼潤月既效應底下，我對香港今年既經濟，係抱有樂觀但係審慎既睇法，亦都講句，香港既營商環境係不容低估既。

blog

blog = web log 博客; 部落格; 網路日誌 (是繼email、BBS、ICQ之後出現的第四種網路交流方式. 通常由簡短、經常更新的帖子構成. 這些帖子按照年份和日期倒序排列, 故稱“網路日誌”)

上面果段野，我係copy Yahoo字典既，佢解釋左blog既意思。

係佢既定義裡面，blog係要由簡短既帖子組成，所以嚴格來講，我所寫既每一個帖，都唔應該構成我個blog既其中一部份，因為我寫既文章，閒閒地都有成幾百甚至上千既字係裡面。

再睇返佢既定義，佢話帖子係要經常更新既，所以嚴格來講，我所寫既每一個帖，都唔應該構成我個blog既其中一部份，因為我所放既每一個帖，我從來都冇更新過，更加談唔上話經常啦。

又睇過佢既定義，blog既中文譯名係“網路日誌”，我個blog極其量都係符合左其中既三隻字，就係“網路”同“誌”，我個blog的而且確係要經“網路”先可以睇到，又符合“誌”既意思，但係我就唔係每日去寫，每日都會打我既blog。

但係點解我仲會叫自己個blog做blog呢？

原因好簡單，因為人地做blog既基本意念，根本就係想你寫一d簡短既文章，然後每日更新你既帖。

我係網路上面睇，每個人寫blog都有自己既風格，好似我咁，我就鐘意長篇大論，寫一堆自己所想所感，而我老婆，佢就會為佢每一篇文章，加入唔同既色彩，而我個大佬，佢就會闊佬懶理，好日都唔寫，就算寫都係寫幾十字，行貨交差，又有d人，貼幾幅相就話係一張帖啦。

所以計我話，blog呢家野，應該點用，應該幾時用，都係悉隨專便啦。

高低起跌

得閒無聊都會睇返自己個blog，睇下自己以前寫過d咩，諗過d咩，做過d咩，呢樣野就係我個blog頭頂所寫既回顧過去。

而每次打blog，我都會將我睇到既野，我既感受，我既睇法，全部寫晒出來，呢樣野就係我個blog頭頂所寫既實踐現在。

當我發生左一d事之後，我建基於我既做法，我既評估分析，去為將來制定計劃，呢樣野就係我個blog頭頂所寫既展望將來。

正正就係過去、現在、將來就構成左我既一生。

每一個人，從一出世，直致死亡，都會經過唔同既階段，而每個階段又會經歷唔同既事情，每一個時期，都會令人的思緒起起伏伏，每一個畫面，都會令人的心情高高低低，係呢度我引用一位古人所講既一句說話：「起伏高低，人的一生也」。

我想講既唔單指係人既一生中有起伏高低，而係每一個地區既股市都有起伏高低。

當一個人遇到開心事既時候，佢既情緒會高漲起來，而當呢個人遇到傷心事既時候，佢既情緒又會低沈下來，呢d高與低，升與跌既情況，同一個國家既經濟，同一個地區既股市，又有咩分別呢？

當一間公司，遇到一d有利公司發展既情況，果間公司既股價就會上升，相反，當一間公司，遇到一d不利公司發展既情況，果間公司既股價就會下跌，係呢度我又想講一句說話：「升跌浮沈，股市也」。

就係咁，情緒變幻無常，世事風起雲湧，高低起跌，浮浮沈沈，又有咩所謂呢？

試諗下，自己的心情會因為咩而高漲呢？會係因為中左六合彩、會係因為結識新伴侶，會係因為生兒育女，萬千個理由。

試諗下，自己的心情會因為咩而低沈呢？會係因為有親友過身、會係因為與伴侶分手，會係因為身家貶值，千百個理由。

係我個腦入面，覺得一個好既投資人，當個股市升既時候，佢會因為自己身家有所上升而高興，而當個股市跌既時候，佢會因為又有機會買平貨而開心，所以計我話，心理質素對於一個投資人來講係好緊要既，無論升市定跌市，佢都可以保持平和既心境，保持冷靜既頭腦，沈著應對，咁就無往而不利啦。

總之咩理由都好啦，呢d都係人生既其中一個階段，呢d都係人生既其中一d小插曲，所以話咩理由，咩情況都好，最緊要都係無悔過去，無究現在，無枉將來，平常心啦。

爛gag

今日，同人傾計果時，唔覺意講左一個爛gag，諗返轉頭，都覺得自己好鬼死爛，個gag係咁既：

有人問我，「太陽有冇可能係西邊升起？」，諗左一陣，我同佢講，「呢d咁既問題，你走來問我，玩咩！」，跟住佢就同我講，「如果真係有可能令到太陽由西邊升起，咁就發啦！」，我帶住悔氣咁同佢講，「咦！又係喎！」，隔左一陣，佢又來問我同一條問題，我就同佢講，「唔好玩啦！」，佢話諗多一陣，諗唔到佢就放棄，我就同佢講，「咁又唔洗放棄既，我都諗到一個可能既」，佢即刻好開心咁問我，「係咩可能呀？」，我話你諗一陣先，轉頭答你，如是者，又隔左一陣，呢條友真係走來問我，「究竟有咩可能呀？」，我就同佢講，「呢一個可能，咪就係“冇可能”囉，死蠢。」，就係咁，係大家都大笑既情況下，完成左一次無聊既對話。

講真，我自己都覺得自己係一個幾悶既人，悶到連爛gag都唔係好識得講，但係睇完林海峰既“求其是但大合唱”之後，就發現，原來悶有時都幾好，至起碼唔會比人叫做“吹水精”，“爛gag王”之如此類呀，係咪先？我諗冇人想講完一大輪野之後，跟住比人講“超低能，勁白痴”架。

近排行書局，又比我睇到一大堆有關爛gag既書，咩“超低能婚禮”、“爛gag始祖”、“hit gag一百個”、“潮語字典”等等，我就知道，時代變啦，自己都真係己經一把年紀，己經被列入為追唔上潮流既一群，唉！

哇！光頭仔呀！

光頭仔新look，新一年，新人事，新作風。

我剪呢個頭係經過深思熟慮既，第一，我都因為想省錢，唔講唔知，剪到個頭咁，可以省到唔少錢，其中可以省到水費，又可以省到gel錢，仲有可以省到再剪頭髮既錢，最後呢個頭仲幫我省到唔少時間添，一舉萬得，勁呀。

但係有少少唔開心既係，有條友話我似某總統個髮型，如果有得揀，我寧可做一個成功既商人，都唔願做總統呀，我都係鐘意利，多個鐘意名。

不過點都好啦，係新既一年，換個新look，迎接新既挑戰。

仲有，今次打呢篇blog，我仲加左一個新原素，就係搵不同之處，首先，你睇完呢篇文章之後，將個畫面拉番高d，跟住用我個光頭look，對比下我細個時果幅相，睇下我個樣有幾多個不同之處，係我下一次打blog，我會公開個答案，係咁先，早抖。