IQ題

唔知係唔係D人近排係咁追睇係咪小兒科，攪到今日筆者都比人問左個IQ題，題目係咁既：「有咩衫唔係用來著架？」。

唔好話筆者扮醒，本人唔洗三秒就答左個答案。

答案係MP3。

但係就係呢條IQ題，就令筆者諗起今時今日既科技真係唔講得少。

因為今時今日既科技，除左打破時間既限制，地域既限制之外，估都估唔到連IQ題都要因為科技而有所改良。

試回想下幾年前，D人會問既一條IQ題：「D人最鐘意聽邊兩個英文字母」，又係唔洗三秒鐘，筆者就答左，個答案係CD。

再試下將兩條IQ題一齊睇，幾年前仲講緊聽CD，但係今時今日，己經走左去講聽MP3。

再諗返第二條IQ題, 點解個答案係CD，唔會係MD，好明顯，有D科技係成功既，有D科技就無咁成功啦。

又再試下答多條IQ題：「D人最鐘意睇邊三個英文字母」，都係果句，唔洗三秒鐘，幾年前筆者會答VCD，近排就會答DVD。

講到呢度，筆者無非都係想講，人同IQ題或者科技都係一樣，要與時並進，不斷創新向前，古語有云：「不進則退」，但係時至今日，筆者唔係咁認同呢句LU，筆者覺得：「進得少，進得慢，唔單只係則退，直頭係等於大退，勁退，或者係超退，爆退，甚至係激退呀」！