香港公園

現時的經濟環境，我都唔洗點講，係一個好明顯既情況，咁係呢個情況之下，大家又有冇計劃去下旅行呢？

講真，我自己暫時就冇計劃出國啦，我會選擇留係香港，支持返本地經濟，咁支持經濟都要去消費架，去邊呢，我有一個好介紹，呢個地方就係香港公園。

作為一個負責任既香港人，就梗係唔單止上網，睇完資料，然後係度大吹一輪，交行貨咁簡單啦，我係今日同我老婆實地玩完之後，先推介比你地既。

呢個香港公園位於中環區，即係香港既金融核心地區，剩係聽到個地區都知價值不菲啦，但你唔洗驚佢收得好貴，入場費好簡單，HK$0，即係咩呀，免費囉。

唔好以為免費就冇野睇，冇野玩喎，佢裡面有好多設施架，好似霍士傑溫室、尤德觀鳥園、體育館、香港壁球中心、兒童遊樂場、奧林匹克廣場、鳥瞰角同菜館，真係講得上，你想食就食，你想玩就玩，你想睇就睇，直情樂而忘返呀。

你係公園裡面行行下，望向地下，你可以望到河水流；你又係公園裡面行下，望向天空，你又可以望到雀仔飛；行到累啦，你又可以企定定，睇下香港各個運動健將既威水史；再唔係既，你想休息下，咁咪去買D野食，同老婆談下情囉。

仲有一樣野，如果你係一個潮人既話，就梗加要去睇下啦，因為係體育館裡面，有好多介紹東亞運動會既收藏展品同運動項目介紹，既然香港可以攪到呢d咁大型既活動，作為熱愛香港最潮既你，又點可以唔幫香港推動下呢個潮流呢。

總之一句講晒，企係潮流尖端既你，咁平、靚、正既活動，一定要支持下，都係果句啦，香港公園，真係符合晒我既要求呀！