投資講座

今日天寒地凍，一早出街，就係為左出席投資講座，講真，我都好耐冇出席投資講座啦，今日出席，又有另一番睇會。

記得以前，股市暢旺時，投資講座又真係坐無虛席，但今日果個投資講座，大約都有三百幾人左右啦，大概九成幾入座率左右，反應都算唔錯。

聽見d人問果d問題，都真係覺得佢地都幾pro架，有人問“價值投資法好，定技術分析好”？有人問“點樣去用相反理論”？又有人問“個市幾時見底”，林林種種，真係唔記得咁多。

剩係聽到呢d問題呀，就知道香港人，係唔單指“感性討論蓋過理性分析”啦。

其實係呢個投資市場，係有好多香港人願意自己做功課，自己去硏究點樣投資，唔識佢地係會問既，奈何有時投資產品，越來越多，越出又越複雜，又真係未必個個會睇得明，個個都有能力硏究。

講返轉頭，價值投資法好，定係技術分析好？點講呀，講是但一樣都會比人話啦，咁咪答唔同方法有唔同既效果囉。相反理論，邊個知道幾時會相反呀，咁咪答唔係咁易用囉。個市幾時見底，講真，知就發左啦，咁咪答而家經濟環境咁，低位好難講，每日都係升升跌跌，有波幅囉。

不過，我都諗到一個有趣既問題，假如通街都係股神，咁係唔係股神又有咩分別呢？