睇相

今日放工果時落大雨，攪到要係美心坐左成粒鐘，好彩都有人陪我傾電話，打發下時間，如果唔係就大q鍋，係呢度真係要感激下呢條友，我都話知己真係用來打發時間，吹下水，傾下電話架啦。

就係呢個時候，路過彌敦道，有條友仔坐係路邊，無啦啦話送三個答案比我，任我問咩都可以，於是無聊的我，就梗係問下佢野啦。

我第一條就問佢，我幾時死，佢就答我：「我有八十幾歲命」。

第二條問佢，我幾時發達，佢就答我：「我會有一億身家」。

第三條問佢，我叫咩名，佢就答我：「中文有陳，英文有I」。

然後佢同我講：「有綠人，耐心等待，只要發福，運隨肉到」。

跟住佢又講：「比幾分鐘我考慮下，仲有冇問題問佢，但每題收五元」。

我諗左一陣，因為諗到呢條友連我性陳，英文名有個I字都知，唔準極都有個譜，所以我就問多幾條問題。

第四條問佢，我會點死，佢就答我：「病死」。

第五條問佢，我老婆日後會點，佢就答我：「伴我終老，但係愛兒多過愛我」。

第六條問佢，知己會點，佢就答我：「只要努力，總有出頭之日」。

問左三條，佢反問我：「覺得點樣」，我答佢：「明玩我」。

佢問我點解咁諗，我就答：「我想早D死，你就話我有八十幾歲命，係唔係明玩我先」。

佢居然同我講：「一蚊都唔收我，只係希望我同老婆和知己將來搵到錢，記住去做善事」。

跟住我都比左廿蚊佢，同佢講，剩左果五蚊，去馬會買條六合彩，做下善事，佢笑笑口講多句多謝我就走左。

搭車諗兩諗，原來自己一生真係有時都幾好，可以經歷下好多人都唔會經歷的事，好似細個做下陳浩南，到大個又可以返大學讀下書，有個好(肥)老婆支持下，仲有個同我一樣咁仆街的知己吹下水，諗兩諗，發唔發達都係其次，只要活得精彩就夠啦。

P.S 最後返到屋企梗係對下六合彩，個結果都係，中左你個頭呀‧‧‧