人生有幾多個十年

人生有幾多個十年，我唔知道，我亦都相信，好多個專家都唔知道，佢地頂多都係會同你講：「根據統計，人類平均有八十年壽命」，佢地絶對答您唔到，您有幾多個十年，而果d話自己識風水既人，都應該答您唔到。

有人講人生成就，唔係在乎有幾多功名偉祿，而係死後有幾多人還在愛您。

我就話人生成就，唔係在乎有幾咁痛痛快快，而係死前有幾多時候風風光光。

功名偉祿，令人痛痛快快；有人愛您，令您風風光光。

我就算只係剩低一年命，我都有人生三個十年，當中有一個人陪我過左一個十年，有一個人愛足我十年，有一個人令我痛痛快快咁過左十年，我相信佢亦會令我既人生，風風光光無限個十年。

死唔可怕，可怕既係，想死但係又怕死；死唔恐怖，恐佈既係，要死仲係恐佈死。

柴九已死，但係四奶奶還在生，四奶奶還在生，可惜柴九已死。

一個人失去知己既心情，我唔知道，但係一個人得到知己既心情，我就歷歷在目。

人生有幾多個十年，冇人知道，但係我有一個好老婆，就係人都知道。

網吧

頭先，係一間快餐連鎖店食完飯，產生左一個念頭，急不及待就要寫低落來。

其實呢餐飯，原本冇咩特別，但就無啦啦有靈感(我好少情況會玩feel)，特別就特別在，坐係我隔離既人，兩班都係上左年紀既，一班叔叔係度講跑馬，一班嬏嬏係度講股票，就係呢兩班人，令我產生左開網吧既諗頭啦。

其實，以前我都有一個朋友開過網吧(而家梗係執左啦)，但就係因為僱客目標定位唔得，開舖地點唔得，管理收費系統唔得，電腦設備唔得，所以呢間網吧好快咁，就同呢個世界講拜拜。

若果我開一間網吧，有以下既一套方法：

開業成本
開業成本$250,000-$300,000 (舖租上期按金、電腦電視設備、上網收費電視費、影碟書籍、桌椅裝修、煮食用具)

每月營運成本
每月成本$200,000(每月舖租、人工、上網收費電視月費、影碟書籍、食物飲品、水電煤費)

銷售額
一個月銷售額：30日 x 30台電腦 x 24小時 x $12收費額 = $259,200

回本期
假設場內共50台電腦，平均每小時有30台提供服務，每小時收費$12，24小時無休。
($259,200 - $200,000) a = $300,000
a = 5.07月

公司發展方向
為一眾中年人士，提供舒適的場所，先進的電腦電訊設備，健康衛生的食物飲品，讓他們可愉快地與志同道合者交流買賣意見，令他們增加電腦應用的知識，更快速準確地獲得合適的市場買賣資訊，從而換取長久的合理回報。

公司口號
上網再唔係年青人既玩意

(1) 目標僱客
我會將我的僱客群定位係中年人士，尤其係鐘意買馬買股票既人，一來佢地有收入或者積蓄，二來佢地會較捨得消費。

(2) 開舖地點
傾向選擇新界地區，而且要鄰近馬會和銀行，主要目的係較接近目標僱客，確保人流，同方便我的目標僱客存款和提款。

(3) 管理收費
中價的服務收費範圍，如上網費用介乎$12-$15一小時，$25-$30一個小食套餐，不時提供節扣優惠(如加$3送多一杯飲品)，定期舉行買賣比賽(如放料王大賽)。

(4) 場內設施
配備穩定快速的電腦及上網設備，舒適靈活的桌椅，可接收賽馬、足球、股票報價的電視電訊設備。

(5) 場內服務
提供專人教授瀏覽馬會、各銀行、證券行之網站的服務，專人講解買賣下注技巧等，亦提供殷勤快速的電腦維修、技術支援、煮食、侍應生及收銀服務。

(6) 書藉電影
可租借各類投資指南、賽馬、足球、六合彩周刊，各式中外港產名片電視劇。

(7) 食物飲品
食物包括各式麵、米、河(如腿、旦、腸)、麵包(如波羅、雞尾、腸仔)、多士(如油、占、奶、醬)。飲品包括各式汽水(如可樂、七喜)、餐茶(如檸檬、奶茶、咖啡)。

(8) 宣傳推廣
不定期派發宣傳單張、市場問卷調查、網絡網站廣告，與類近商戶提供聯合優惠等。

我的志願

睇完一個電視節目，有d靈感打blog。

好多係香港讀書既小朋友，都應該試過作文，題目係我的志願。

講真，我自己都唔記得左當時寫左d咩，回想再回想，估完又估，都唔係好肯定自己寫左d咩。

究竟係寫左做警察、做消防員、做醫生，定係做富豪？

估來估去，覺得最大可能既應該係做古惑仔，或者係做好食懶飛既人。

但係諗深一層，小學就叫d小朋友寫一個咁既題目，係唔係會難左d呢？

一般小學生只係得果7至8歲，你要佢係一個全無數據既情況底下，規劃佢將來既發展路向，呢個題目既難度分我會比99.9分。

其實寫願景一般都係當公司未正式成立時寫既，主要目的係為公司日後發展提供指引，講真，呢樣野，就算係一個經驗十足既人去寫，都未必會寫得好啦，何況係一個小朋友，再加上，寫得好又唔係代表做得到，咁寫來又有咩謂呢？

不過我都好有興趣知道，究竟有幾多人真係寫得好，而又做得到既，知道下都幾得意呀。

雖然我覺得都有d無謂，但始終都係應該寫既，一來就梗係要來交功課啦，二來又可以大個回味下，其實都係一個唔錯既題目。

想將呢樣野變得唔再無謂，可以試下，日後當自己的仔女寫完我的志願之後，就拿來同佢講下，要點樣做先可以達成佢既志願呀？有冇其他志願比呢個志願更好呀？呢個志願係唔係真係識合佢呀？又可以多一個藉口同佢講，你唔乖，你個志願就遠離佢好遠架啦。哈哈。

企業的愛與情

小時候，不斷地從社會中得知，一間成功的企業，當中必然要有雄材偉略的老闆、努奮上進的員工，與別不同的產品或服務，與及財力雄厚的資本，萬萬都想不到，原來一顆樂於助人的心，亦是一間成功企業的重要原素。

擁有一顆樂於助人的心，可助企業建立良好的對外和對內的關係網。對外，企業可與供應商、顧客、政府、行業工會、外判商、銀行，甚至競爭者建立良好關係；對內，企業可與員工和股東建立緊密溝通的關係。

千萬不可看輕此等關係，因很多時企業的生死存亡，亦只是靠這一點點的因素。 舉個例子，當企業面臨財務困難時，若企業與股東的關係良好，股東會比較願意再增加投資，匯豐銀行正正就是很好的實例；再舉一例，當企業面臨經營困難時，若企業與員工的溝通緊密，員工很多時都會接納企業的特殊安排，國泰航空正正就是很好的實例。就這樣，企業可安然度過一次難關，重新掁作，再向高峰邁進。

說回頭，一顆樂於助人的心，並不是一朝一夕可得出的，人們亦不會從單一事件就判定該企業有這樣的心，一顆樂於助人的心，是長久不斷，重複又重複，持之以恒，不斷地累積而成的。 所以有人說，當老闆應重理重數據，本人就說，除了理據外，還要重情重愛。

天才

現在己經係五月尾了，好多學生哥應該考完試啦，就快放暑假，究竟係暑假度做咩好呢？

有學生會為來年的課程提早準備，有學生會盡情為假期注入歡樂原素，有學生會在暑假時期做暑期工，又有學生會參加一些暑期課程，各有各精彩。

自古以來，好多時都係父母替子女安排打點一切，但父母一般都是根據子女的興趣，或按當時社會潮流，甚或胡亂喜好而作出安排，本人就建議應按兒女的專長而作出安排。

我睇過一份報告，內容大致係天才兒童，他們只是先天有某種特殊技能，加上後天培養，才會成為某方面的天才。

根據子女興趣作出安排，無疑可令子女更有心機學習，但兒童不竟大多數都只是三分鐘熱度，不能長久。

按當時社會潮流作出安排更糟，一來未必識合子女，二來潮流好快會過去，不宜採用。

按胡亂喜好作出安排，可謂糟到不得了，不值一談。

但按子女的才能作出安排便截然不同了，子女不單可輕易從學習中得到成功感，令他持之以恒地學習，還可令他們在日後的人生旅途上建立一技之長，增加自信心，更可以大大地提升成為天才兒童的機會，一舉三得，何樂而不為呢。

九周年

過了一年，回顧一年，計劃一年，周而復始，又係新既一年。

共同面對喜與悲，互相承擔樂與憂，一起度過歡與愁。

過去、現在、未來，始終如一；昨天、今天、明天，循環不息。

飲茶、圖書館、出前一丁，都不及一罐可樂；關心、慰問、照顧，都不及一個老公。

銀行、保險、證券，亦只不過是金融；衣服、住宿、化妝，亦只不過是設計。

九年前的今天，是甚麼景象？九年後的今天，又是甚麼景象？今天，會是甚麼景象？天之道！

氣氛

氣氛真係可以好影響人的心情狀態。

回想當年，本人都試過在私立學校讀書，一般的學習風氣都比較不嚴謹，有時會有同學逃學，亦有時會有同學不交功課，更有時會有同學破壞上堂秩序，說實在，在這樣的環境下學習，真的不是那麼容易。

但每一次，本人想到學費是那麼昂貴，機會是那麼缺乏，便一次又一次的挺直身子，排除那些不良的引誘，不良的風氣 ，集中心力，努力學習。

自少便聽過一句說話，「浪子回頭，千金難求」，本人雖說不上是甚麼浪子，但總算經歷過由壞轉好的時期，其實，固中辛酸，真係少一點耐力恒心都不能克服。

雖然外在環境有很大的影響力，但本人還是覺得，結果最終要看他本人的睇法和做法，只要他一直保持決心，努力向著目標，決不輕言放棄，那麼他還是會有出頭的一天。

最後還想說一句說話，是本人從動畫中聽到的“等價交換”，大概意思是，若要獲得某樣東西，便要用相同價值的物件作出交換。

這句說話亦可應用於自己的人生，若你想換取一條光明大道，便雖用玩樂消費的時間作出等價交換，若你想要擁有一個傑出的老公，便要付出等價的容忍作出交換，有得有失，天之道。

在此亦提醒自己一句，想學懂珍惜，可以嘗試用自己喜愛的東西作出交換，例如，本人會用精神心機來換取在股票市場的節節勝利，又例如，老婆會用愛心來換取本人一樣。

十二配二十

上星期，到過台灣旅遊，其中一個參觀的地方是一所飾物店，那裡只是售賣一種商品，用一種動物做主題的商品，據說雄性的可增加財運，據說雌性的可作僻斜之用。

按店員解說，人「不怕生壞命，最怕改壞名」，他還說，名字的筆劃很重要，最好的必然是九四一三，最壞的必然是零筆劃。

舉個例說明那才是好的名字，假若你的名字是英文，就會是一個好名，英字有九劃，文字有四劃，九加四就係十三劃，有十三劃的名字，會是人中之龍，王中之王。

舉個例說明那才是壞的名字，假若你的名字是二到，就會是一個壞名，二字有兩劃，到字有八劃，二加八就係十，零劃，會有不良的怪異事情發生。

我的名字係五加七，就係十二劃，名格欠木，應佩帶木性飾物。

老婆的名字係五加十五，就係二十劃，名格欠水，應佩帶水性飾物。

再睇一睇，我十二劃，老婆二十劃，正正就係絶配既筆劃，一個先十後二，一個先二後十；一個快頭慢尾，一個慢頭快尾；各有千秋，互補不足。

互補一，我用腦，佢食力。我做事計劃周詳(得個諗字)，老婆做事親力親為(得個做字)。

互補二，我顧前，佢(典)後。我做事係諗大方向，老婆做事係執手尾。

互補三，我搵錢，佢儲錢。我搵錢多計，佢儲錢唔洗。

互補四，我發放正能量，老婆發放負能量。我成日話自己有幾好幾好，老婆成日講自己有幾慘幾慘。

講到我地兩公婆互補不足的情況，真係講十世都講唔完，但係本人始終還是覺得，互相扶持，互(免)信任，對兩公婆來說，真係好重要，真係可以發揮到好大作用。

到最後，按店員所講，「剩係諗唔做，無用；剩係做唔諗，又係無用」。

要有策劃力，重要有機動力，漁漁咁樣，先可以得水。

新聞

睇過香港特別行政區長官近日的新聞，香港人當然明白是甚麼的一回事，不用多說，但要講的是，特首是否具有代表性和價值觀的問題。

事實上，特首的職位和功能，某程度上已給了他代表權。

不同地區的人士，看一個地方的環境(包括政治經濟)，很多時候都會從當地最高領導人的言論或者行為來作出推論，例如我們看中國，必定會看一看胡主席或溫總理所發放的信息，或者看美國，一定會聽一聽奧巴馬的言論，那我們看香港，必然就是留意特首的發言。

再者，特首其中一個責任，就是收集香港人的意見，然後作出整合，向中央政府反影港人民意。

此外，特首亦須要代表香港，與其他地區或者國家簽訂不同的協議或者進行談判交流。

就職位性質而然，本人覺得特首應該附有某程度上的代表性。

但這次，香港社會作出的反應，顯然不單只是特首的代表性，而是疑似價值觀問題。

一九八九年六月四日是一個不開心，甚至痛心的日子，回想當年，本人仍在小學時期，學校特意安排在早會和小息等時候，集合全校師生一起在操場上祈禱，希望事件盡快得到解決，亦為一眾同胞祝願，那一幕幕感人的情景，那一幅幅熱血的畫面，尤似昨天發生一樣，刻骨詺心。

普遍來說，人類的價值觀存在著一些差別，應該不盡相同，例如有人會較喜歡熱鬧城市，亦有人會較喜歡寧靜郊外，有人思想偏理性，有人思想偏感性，等等。

舉一個活生生的例子：「有時候，我的看法會與老婆相同，但有些時候，我和她的看法亦會出現不同的情況」，就這一個例子，我和老婆一起生活長達九年，相信没有一個人，比我和她更親密，相信没有一個人，比我和她有更相近的生活習慣，但實情是，我和她的價值觀亦存在著一點點的差異。

所以在價值觀的問題上，本人覺得，一個人不可能在任何情況下完全代表其他人，不可能完全地代其他人的價值觀發言。

話說回來，本人相信今次特首的發言，只是說明他所感受到的情況，並不存在其他成份，但在此亦希望他做好這份工，用心用行動，多聽取民意，多了解民情，想香港人所想，急香港人所急。

人生目標

每一個人，都應該為自己設立最小一個目標，而目標越清晰，越容易達成。

例如「我想賺大錢」這一類目標，雖然有方向，但不夠仔細。

應該說成「我要在2009年5月18日至2012年12月31日期間，在金融市場中，使用一百萬資金，買賣不同類型票據，其中包括股票、期權、期貨、外匯、基金、保險和存款等，額外獲取一千萬利潤，用以支付2013年1月1日至2023年12月31日，自己、老婆和兒子的各項生活開支，當中包括衣、食、住、行、醫療、教育和旅遊」。

設立這樣仔細的目標，可以讓自己清楚知道，何時做甚麼、如何運用資源、用甚麼方法、最終達成甚麼結果、對自己有何益處、是否可如期達成目標等。

本人已為自己設立目標，你呢？

台灣遊

里程碑

Family，這個英文字，相信很多人都對它並不陌生，若根據字典的解釋是家庭，但在本人的思維內，這個字有一個更深層的意思，那就是同系的群體，同系則代表著他們擁有一定程度的相似特徵，甚至乎百份百相同的特徵。

人生存在著很多不同的階段，每一個階段由不同的情節所組合而成，而每一個情節亦由不同的畫面所組合而成，我們可由畫面推論至情節，再將其擴至階段，那麼一個人的一生便大約可得出結論了。

里程碑，標示了一段距離既相段間距，常見的地方包括高山、小徑、效區等，其後申引指人生的不同階段。

伴侶

伴侶，其實存在著很多的用途，除了開心時和你分享之外，還有傷心時與你分擔，總之伴隨著你，步過人生的起伏跌盪，度過每一個春夏秋冬。

而在本人心中最感到高興的，定必是與伴侶一同成長，與伴侶一同有所增長。

一位老伯伯，年事七旬，看他的衣著，他的神緒，真的不清楚他“度過多少個寒冬，看過多少人間世情”。

今天他贈我的一席話，像把我從天上摘下來，令我深深感受到「家有一老，如有一寶」的道理。

年輕人：『人如橡膠圈，人生如橡膠圈的彈力，膠圈與彈力，自己和伴侶，缺一不可」。

雖然直致現在，我還未懂當中的意義，尚不曉得背後的動機，但是幾可肯定的一點，已找到陪我終老的伴侶了。

會在發達時為你開心，會在發病時為你煎藥，會在發呆時為你解愁；會在累透時陪你在街中溫習，會在肚子餓時為你煮食，這樣的一個人，這樣的一個伴侶，夫復何求，世間難求矣！

相信，本人只可承諾，伴她走過每個天涯海角，到處放下幸福的足跡。

卡通片

我細個果陣，好鐘意睇一套卡通“聖鬥士星矢”。

主角係故事裡面，經常都會遇到好多困難既情況，但每一次都能夠將呢d困難逐一解決。

好多時星矢係遇到困難既時候，都會回想起一d人或者一d事，例如，星矢會想起佢還未搵到佢家姐，又例如，佢會想起佢身邊既戰友仍然係度戰鬥之中。

就係呢一類既事情或者人物，支持住星矢既意志，令佢有意識，一次又一次咁提升佢本身既能力去克服困難。

其實呢個都係心理學既研究範圍，心理醫治既其中一種方法。

而呢套卡通片，亦令我想起一個管理學既理論，叫“FIVE FORCES”，呢個理論主要係講競爭既，佢係講透過分析五種外在既力量，對一間企業本身既競爭力有咩影響，講真，我覺得呢五種力量，除左係會打擊企業既競爭力之外，仲會提升企業既競爭力既。

我今次想講既並唔係呢d，我想講既係，一個人除左佢本身既能力之外，其實仲要睇下呢個人既周邊，有咩會令呢個人，一次又一次咁提升佢自己既能力。

我舉一個例子，呢間亦係我好鐘意既企業，“香港鐡路有限公司”(港鐡)。

港鐡佢本身既能力，好明顯會係佢鐡路既營運能力，但係大家千祈唔好忽略佢既周邊設施，佢既競爭力其實好強，例如好多人除左因為港鐡快之外，仲會因為想拿一份免費報紙去撘地鐡，亦會因為想係地鐡站裡面既店舖買野而走去撘地鐡，更會因為只係約會朋友而走左去地鐡站，甚至乎因為唔識路而入地鐡站度睇地圖，所以我對地鐡既前景投放左萬二分既信心。

但係一個人呢？佢除左自己本身既能力之外，佢既周邊又會有d咩呢？

個答案好簡單，就係呢個人身邊既人與物。

就好似星矢咁，佢有一個目標“搵返佢家姐”，好多時都因為呢個目標，佢又再次爬翻起身。

除左有一個目標之外，佢亦有一班可以同佢出生入死既戰友，每逢遇到困難，戰友亦會作出一定程度既支持，就係咁，星矢又再有新既力量從新掁作。

另外，星矢仲有一個佢要保護既人“雅典娜”，每當星矢知道雅典娜有危險既時候，星矢都有一股衝勁排除萬難，去迎救佢心目中既女神。

將呢d一連串既因素放係自己度，睇下周邊既有咩可以幫到自己。

先睇下自己既目標，有冇為自己定立一個目標呢？

呀！有。我既目標係死之前要有一億資產，一個完整幸福既家。

而戰友呢？

暫時仲未有可以同我出生入死既戰友，但係都有一個相識左十幾廿年既大佬，可以得閒陪我打機，傾電話。

要保護既人，我係有唔只一個既，首先必然係首位既，就係我老婆，相信佢都係唯一一個可以對我有諸多要求既人，第二個當然係我個仔啦，呢個仔睇怕日後都會係我其中一個克星，而家要對佢作出保護，日後要諗計對佢作出好多安排。

諗兩諗，原來自己都幾多責任個播，而家都係集中火力，向住自己既將來衝呀衝，唔好比自己停，有前冇後，做死罷就。

公仔書

好多人都知，我鐘意睇公仔書，由其係古惑仔，雖然早排佢轉左做三日刊，但亦都無損我對佢既睇法，不過我懷疑有d拖橋既情況。

但係近期佢有一d原素，我都幾鐘意既。

第一個係佢加左一個叫“牛佬筆下既畫壇至尊”既環節，不過而家完左，主要係講牛佬眼中既王玉郎，d情節又攪笑又抵死，好奇既人，都應該睇下，究竟一代漫畫宗師，佢私底下既生活同工作情況係點。

第二個係佢加左一個叫“人生對對碰”既環節，主要係講牛佬點睇一d人生百態，有時仲會有唔同既投稿人講下佢地自己既睇法，其實我有時睇下睇下，都有d衝動想投稿。

第三個，亦係最新既一個，叫做“職業連環圖教材”，呢個環節，牛佬話係對佢自己既一個交代，係佢晉身畫壇多年既成績表，主要目的係自娛。

牛佬將呢個“職業連環圖教材”分左做十個章節，而家出左第一章，仲有九章，對漫畫行業有興趣既人，都可以買來睇下，本人睇完第一章之後，就覺得都值得花少少時間同金錢，去睇下究竟漫畫業行內人，究竟係點睇呢個行業，或者睇下當中，有咩可以借鏡參考啦。

呢十個章節，大概分為，入行前既準備、入左行既情況、由構思到畫畫至發行，要留意既地方同技巧等等，當中所涉及既經驗知識，我相信冇返咁上下功力，就真係寫唔到既。

話時話，我都覺得，一個人去到某一個時期，都應該根據自己既能力，去為社會做一d野，就好似牛佬咁，佢去到而家係漫畫界既位置，佢就想為漫畫界做一d事，出一d力，呢個做法都幾好呀。

到最後，就梗係利益申報啦，本人只不過係古惑仔既長期fans，同古惑仔漫畫或該漫畫機構，或者該機構的任何股東和員工，甚至乎同牛佬係完全無任何其他關係，係呢度寫古惑仔漫畫既情節，只不過係想寫我自己對呢本書既一d睇法，並無任何推廣宣傳既商業動機，更無任何收受利益既關係。

(而家寫低先，提下自己，等我將來係證券界有所成就，有時間都寫返一個“證券買賣教材”專欄)。

股市

間唔鐘都會有人問我，而家個股市咁既情況，我點睇呀？

我就會答佢地，有升有跌，正常到唔正常咁啦。

跟住佢地就會問，有咩特別睇好，有咩特別唔睇好？

我就會答佢地，有升有跌果d，我都睇好，唔升唔跌果d，真係要諗下先。

最後，佢地就會講，比小小心得聽下啦。

我就會同佢講，股票呢家野，心得係自己比心機發掘出來，唔係人地比既。

等我解釋下啦，股票有升有跌，咁樣先至健康，如果冇升冇跌，即係代表停左市，咁就一定有事發生左，係好係壞，要視乎情況而定。

咁點解我話，有升有跌果d我都睇好，因為有升有跌，都可以有賺取股價升跌既可能，如果冇升冇跌，最多都只會得收息一個好既可能性，所以要諗下先。

至於心得呢家野，就梗係要自己搵啦，因為投資必然涉及風險，自己最清楚可以承擔幾大既風險，自己最清楚自己投資既目標，所以自己做功課，就可以做一個最合符自己既投資組合，個結果係點，天之道。

講真，係我心目中，股市其實只不過係一個存放資產既地方，就好似以前d公公婆婆，將自己既積蓄放係床下底，或者將自己既錢存入銀行咁，只不過係擺放既地方唔同，冇咩特別。

唔同既地方就係，所涉及風險同回報既程度，將積蓄放係床下底，最多都只係驚有人打劫，或者屋企火燭，甚至驚通漲過高，風險程度比較低，回報係近乎零，但係將積蓄放係床下底都有佢既好處，就係流動性高，你鐘意幾時用就幾時用，而唔須要有時間同手續既問題。

而將錢放係股市，一般涉及既風險同回報都高好多，風險包括有因為雷曼事件發生後，大家特別關注既公司倒閉風險，你所買既公司股票營運既風險，市場既風險，就好似政治、經濟、科技、社會文化、人口結構、同地理因素等，而回報方面，一般都會係睇股價既潛在升幅，股息比率等等。

所以個股市情況係點，升升跌跌正常事，有升有跌就睇好，心得硏究自己做，就係我既睇法啦。

混合體

每個人都有佢自己獨一無二既人生體驗，相信都冇人係完全一樣，極其量都只會係生老病死，甚至乎係生和死，因為有d人，尚未經歷老年，或生病就死左。

而我的人生，直至現在，可以用三個階段去形容。

第一個階段，尚未成熟時，係呢段時期，大多數時候都受到父母某程度上既影響，我形容呢段時期係我人生中，最為苦悶既時期，大多時候都處於一個唔開心既狀態。

第二個階段，古惑仔時期，係呢段時期，大多數時候都受到朋友某程度上既影響，我形容呢段時期係我人生中，最為開心既時期，大多時候都處於一個極度歡樂，蝦蝦霸霸，極度休閒既狀態。

第三個階段，漸趨成熟時，係呢段時期，大多數時候都係受社會某程度上既影響，我形容呢段時期係我人生中，最為忙碌既時期，大多時候都處於返工返學，壓力迫人既狀態。

就係咁既人生經驗，出左我呢個，既有為人父母仁慈既性格，又有古惑仔橫盲既手段，更有弱質書生既情操，我呢個混合體，本人覺得都可謂一絶。

一方面，可以斯文溫柔，大方得體，另一方面，又可以冷血無情，暴力燥狂。

所以間唔鐘，我身邊既人都會同我講“真係估你唔到”。

不過我覺得，我最出色既都係“出得廳堂，入得廚房，仲要上得床”既混合體呀！ 簡單d講，人見人愛，車見車載，棺材見到都打開蓋呀。

因為出到街，好多時我都係策劃行事，而係屋企，好多時我都係入廚煮食，而我老婆就從來都唔會講我能力超卓，反而成日講，我唔關心佢，無保護佢，唉！無厘頭投訴！

仲有呀，同佢玩完個九型人格測試，我係領袖型，話我天生係一個領導者，佢係助人型，仲話佢係唔鐘意作出請求，但唔知點解唔講埋下一句，鐘意作出投訴。

但係諗返轉頭，我父母幫我改個名，可能已經有所提示，IRVIN，發音係“挨焚”，潛在意思應該係挨住個焚，即係就死就死，但又死唔去，不過都果頭近呀！哈哈！